Filmdagi roli sabab suratga olish jarayonida yangi kasblarni o‘zlashtirgan mashhur aktyorlar

Shunday holatlar bo‘ladiki, aktyorlar rollariga kirishib ketganidan butunlay yangi ko‘nikmalar yoki hatto biron bir kasbni o‘rganishiga to‘g‘ri keladi. Agar kino karyerasida biror narsa yuz bersa ham o‘rgangan ko‘nikmalari sabab boshqa sohada ham bemalol ishlashlari mumkin.

Robert De Niro — taksi haydovchisi va bokschi

Robert De Niro “Taksichi” (1976) kult filmi suratga olish boshlanishidan oldin haqiqatan ham litsenziya oladi va bir oy davomida kuniga 12 soat taksi haydovchisi bo‘lib ishlaydi — Nyu York va uning atrofida yo‘lovchi tashiydi.

Martin Skorsezening “Quturgan buqa” (1980) filmidagi bokschi Jeyk LaMotta roli uchun ham Robert De Niro qizg‘in tayyorgarlik ko‘rgan va hatto Bruklinda 3 ta haqiqiy boks uchrashuvini o‘tkazgan, shulardan ikkitasida g‘alaba qozongan.

Shuni ham ta’kidlash kerakki, suratga olish paytida aktyor 27 kilo vaznga ega bo‘lgan. Natijada bosh rolga tayyorgarligi va ajoyib ijrosi uchun De Niro ikkinchi “Oskar”iga sazovor bo‘ladi.

Xoakin Feniks — o‘t o‘chiruvchi

Xoakin Feniks har doim rollariga alohida tayyorgarlik ko‘rishga harakat qilgan. Bu “49-jamoa: Olovli zinapoya” (2004) filmiga ham tegishli. Unda Feniks har kuni hayotini xavf ostiga qo‘yadigan va Baltimor Sitidagi eng yaxshi o‘t o‘chirish bo‘limining muhim qismiga aylanadigan yangi o‘t o‘chiruvchi rolini o‘ynaydi.

Suratga olishga tayyorgarlik ko‘rish uchun Xoakin Feniks bir oyni o‘t o‘chirish kollejida va yana bir oyni Baltimordagi haqiqiy o‘t o‘chirish brigadasida o‘tkazadi. Aktyor bir necha bor alangaga kiradi va oxir-oqibat jamoaning faxriy a’zosiga aylanadi.

Yana bir qiziq jihat: suratga olish boshlanishidan oldin Xoakin Feniks balandlikdan shunchalik qo‘rqardiki, o‘t o‘chirish bo‘limida 6 metrlik ustundan tusha olmasdi. Ammo mashg‘ulot oxirida aktyor qo‘rqmasdan 20 qavatli bino balandligidagi devorga osilib chiqadi.

Margo Robbi — figurali uchuvchi

Mashhur amerikalik aktrisa Margo Robbi figurali uchuvchi Tonya Harding rolini o‘ynagan “Tonya dunyoga qarshi” (2017) filmi uchun birinchi “Oskar” nominatsiyasini oladi. Qizig‘i shundaki, Robbi Avstraliyada o‘sgan va hech qachon figurali uchish bilan shug‘ullanmagan. Umuman olganda, u konkida uchish tajribasiga ham ega emasdi.

Ushbu rol uchun aktrisa 5 oy davomida professional murabbiy Sara Kavaxaradan har kuni figurali uchish bo‘yicha saboq oladi. Margo Robbi filmdagi eng qiyin tryuklardan tashqari ko‘plab elementlarni o‘zi ijro etgan.

Natali Portman  — balerina

Darren Aronofskiy rejissyorlik qilgan “Qora oqqush” (2010) dramasi uchun aktrisa Natali Portman bolaligidagi balet darslarini eslashi kerak edi. Suratga olish boshlanishidan bir yil avval u asta-sekin barcha stresslarga ko‘nikishi va moslashishi uchun xoreograf bilan 6 oy davomida kuniga 2 soat mashq qilishni boshlaydi. Shundan so‘ng aktrisa kuniga 5 soat mashq qiladi va bunga suzishni ham qo‘shadi.

Portman balerina Nina Sayers roli uchun 9 kiloga ozadi. Shuningdek, u musiqani his qilishni o‘rganadi va klassik harakatlarning barcha turlarini o‘zlashtiradi. Afsuski, suratga olish uchun bunday qizg‘in tayyorgarlik bilan birga Natali jarohat ham oladi. Bir marta uning miyasi chayqaladi, keyin esa qovurg‘asi jarohatlanadi, natijada to‘liq tiklanish uchun 6 hafta kerak bo‘ladi.

Ammo rolga bunday sadoqatli tayyorgarlik e’tirof etiladi. Natali Portman o‘zining ajoyib ishi uchun “Eng yaxshi ayol roli” nominatsiyasida “Oskar” bilan taqdirlanadi.

Adam Drayver — avtobus haydovchisi

Aktyor Adam Drayver “Paterson” (2016) filmida avtobus haydovchisi rolini o‘ynaydi. Dastlab rejissyor Jim Jarmush avtobusni boshqarish paytidagi kadrda Adam Drayverni ko‘rsatish uchun to‘g‘ri kamera burchaklari va kombinatsiyalangan kadrlardan foydalanmoqchi bo‘lgan. Ammo bunga ehtiyoj ham qolmaydi.

Drayver o‘z tashabbusi bilan avtobus haydashni o‘rganishga qaror qiladi. Aktyor avtobus haydashni o‘rgatadigan maktabga ro‘yxatdan o‘tadi va Nyu Yorkdagi umumiy mashg‘ulotlar 3 oy davom etadi. Asosiy suratga olish ishlari boshlanishidan bir hafta oldin u oxirgi haydovchilik imtihonini topshiradi.

Filmda Adam Drayver (qizig‘i shundaki, uning familiyasi ham “haydovchi” deb tarjima qilinadi) o‘zi avtobusni shahar ko‘chalarida boshqargan, garchi bu dastlab kaskadyorlarni xavotirga solgan bo‘lsa ham.

Adrian Broudi — pianinochi

Adrian Broudi rejissyor Roman Polanski tomonidan suratga olingan “Pianinochi” (2002) filmidagi Vladislav Shpilman roli uchun 14 kilo vazn yo‘qotadi. U o‘z xohishiga ko‘ra kvartirasidan ko‘chadi, mashinasini sotadi va roliga moslashish uchun umuman televizor ko‘rmaydi.

Musiqiy mahoratga kelsak, Adrian Broudi bir oy davomida kuniga 4 soatdan pianino chalishni o‘rganishiga to‘g‘ri keladi. Bu ham juda qiyin edi, chunki bir vaqtning o‘zida Broudi rolida ishonarli ko‘rinish uchun qattiq diyeta ham qiladi. Aktyor Shopenning eng mashhur pyesalaridan parchalar ijro etishni o‘rganadi, bu esa unga kamerada ishonchli ko‘rinishga yordam beradi.

“Pianinochi” filmi uchun Adrian Broudi “Eng yaxshi erkak roli” nominatsiyasida “Oskar” oladi va ushbu nominatsiyani olgan eng yosh aktyorga aylanadi.

Kianu Rivz — xokkeychi

Kianu Rivz bolaligida professional xokkeychi bo‘lishni, Olimpiadada Kanada jamoasida o‘ynashni orzu qilgan. U darvozabon sifatida o‘ynagan va maktab jamoasi tomonidan “Devor” laqabini olgan. Biroq kichik jarohat va teatrga bo‘lgan ishtiyoq uni xokkey orzusini unutishga majbur qiladi.

Yosh aktyorning ilk jiddiy rollaridan biri “Yosh qon” (1986) dramasi bo‘lib, filmda u Xiver ismli xokkey darvozaboni rolini o‘ynaydi. Kianu Rivz filmda xokkey mahoratini namoyish eta olishi uchun muz ustida qattiq mashq qilish kerak edi. Ba’zilar aktyor hech bo‘lmaganda professional talabalar jamoasida o‘ynashi mumkinligini ta’kidlaydi. Kanada milliy xokkey jamoasi esa bitta ajoyib darvozabonni yo‘qotganga o‘xshaydi.