“G‘iybat va mish-mishlardan depressiyaga tushib qolgandim”. “Choliqushi” seriali yulduzi Aydan Shener oilasi nima sababdan darz ketgani haqida

Rashod Nuri Guntekinning “Choliqushi” asari asosida 1986-yilda suratga olingan shu nomli serial o‘zbek tomoshabinlarining qalbidan joy olgan. Serial bosh rol — Feride obrazini ijro etgan aktrisa Aydan Shenerga katta muvaffaqiyat va mashhurlik olib kelgan.

Aktrisa turk teleshoulardan biriga bergan intervyusida shaxsiy hayoti haqida so‘z ochdi. 1981-yilda “Miss Turkiya” unvoniga sazovor bo‘lgan vaqtda Aydan 18 yoshda edi.

O‘sha davrni eslab, Shener aktrisalikni tanlaganidan pushaymonligini so‘zlab berdi:

Men juda yosh edim. Go‘zallik konkurslari ko‘plab qizlar uchun aktrisalik faoliyatini boshlash uchun poydevor bo‘ladi. Men esa bu yo‘lni atrofimdagilar qistoviga ko‘ra tanladim, — deydi aktrisa.

Shuningdek, Aydan shou-biznes olamida xiyonat juda ko‘p ekanligidan shikoyat qildi, zero u sadoqatni eng oliy fazilat deb hisoblaydi.

Hozirgi zamonda sadoqatni qadrlamaydilar. Masalan, men xiyonatga uchrasam, o‘sha insondan qasos olmayman, shunchaki uni hayotimdan chiqarib yuboraman. Kino olamida ko‘p bor nohaqlikka duch keldim, bunga chidolmay isyon ko‘tardim, bahslashdim. Afsuski, g‘iybat va mish-mishlar tufayli depressiyaga tushib qoldim. Shu sababli aktrisalik kasbini tanlaganimdan afsusda edim, — deya so‘zida davom etdi Aydan.

Hozirda fikrim o‘zgargan va men avvalgidan ham baxtliman. Mashhurligim va muxlislarning mehridan zavqlanaman, — deya tan oldi u.

Aydan Shener qisqa muddat davom etgan turmushi haqida ham aytib o‘tdi:

Men juda erta — 19 yoshimda turmushga chiqdim. Fikrimcha, nikoh inson tabiatiga zid narsa, — dedi aktrisa.

Aydan 30 yildan beri yolg‘iz yashaydi. U erkinlikni yaxshi ko‘radi. Uning sobiq turmush o‘rtog‘i Turkiya terma jamoasi va “Galatasaroy” klubi futbolchisi Ayxan Akbin undan sakkiz yosh katta edi. Ular moda ko‘rgazmasida tanishib qolishgan va bir yildan so‘ng turmush qurishgan. Ularning qizi uch yoshga to‘lganda juftlik ajrashib ketdi.

Akbin rafiqasi uyda o‘tirishi va faqat ro‘zg‘or bilan band bo‘lishini istar, o‘sha paytlar Shenerga katta loyihalarda ishtirok etish takliflari kelib tushardi. Aydanning turmush o‘rtog‘i ayolining mashhurligiga chiday olmas, qattiq rashk qilar edi. Tug‘ilgan kuniga eri paranji sovg‘a qilganida aktrisaning sabri tugadi va ajrimga qaror qildi.

 Men musulmonman va Allohga ishonaman, lekin ro‘mol o‘ray olmayman, — deydi Aydan.