Afg‘onistonda suv toshqinlari oqibatida halok bo‘lgan fuqarolar soni 153 nafarga yetgan. Bu haqda Al Jazeera nashri xabar berdi.
Manbada aytilishicha, mamlakat bo‘ylab davom etayotgan suv toshqinlari va noqulay iqlim sharoitlaridan eng ko‘p Bag‘lon viloyati zarar ko‘rgan. Viloyatdagi minglab uylar vayron bo‘lgan.
Tolibon Ichki ishlar vazirligi 153 nafar fuqaro halok bo‘lganini rasman tasdiqlagan. Toshqinlar davom etishi bilan halok bo‘lganlar soni ham oshishi maʼlum qilingan.
Ichki ishlar vazirligi matbuot kotibi Abdul Matin Qane uchta viloyatda jabrlanganlar soni 138 kishini tashkil qilishini maʼlum qilgan. Jabrlanganlarga tezkor ravishda yordam ko‘rsatilgani bildirilgan.
“Tolibon” hukumatining bosh matbuot kotibi Zabihulloh Mujohid ijtimoiy tarmoqdagi postida “yuzlab odamlar bu dahshatli suv toshqini tufayli halok bo‘lgani, ko‘pchilik jarohat olgani” ni maʼlum qilgan.
Shimoldagi Bag‘londan tashqari, shimoli-sharqdagi Badaxshon, markaziy G‘or va g‘arbiy Hirot viloyatlari ham toshqinlardan jiddiy zararlangan, katta moliyaviy yo‘qotishlarga olib kelgan.
“Milliy Mudofaa vazirligi hududlarda favqulodda holat eʼlon qilgan holda jabrlanganlarga oziq-ovqat, dori-darmon va birinchi yordam tarqatishni boshladi”, — deyiladi “Tolibon” hukumati rasmiy xabarida.
Toshqinlar sabab Badaxshonning 20 ming aholi yashaydigan Tishkan tumaniga kirish yo‘li to‘silib qolgan. Hudud bilan qayta aloqa bog‘lash uchun qutqaruv guruhlari ishga solingan.
Izoh (0)