Surxondaryo viloyati Denov tumanida korxonaning 1,7 milliard so‘mini talon-toroj qilgan shaxslar aniqlandi, deb xabar beradi Bosh prokuratura huzuridagi departament.
Qayd etilishicha, departamentning Denov tuman bo‘limi tomonidan tergovga qadar tekshiruv o‘tkazilgan. Tekshiruvda “D.” va “B.I.” MCHJ bozorining masʼul shaxslari 1,2 milliard so‘m kredit mablag‘i evaziga xarid qilingan Isuzu rusumli ikkita yuk avtomashinasini soxta hujjatlarni rasmiylashtirish orqali o‘zlarining nomiga xususiylashtirib olgani aniqlangan.
Ushbu avtomashinalar MCHJga xizmat ko‘rsatmagan bo‘lsa-da, mas’ullar bank filialidan kredit mablag‘i uchun MCHJning patta pullari hisobidan 678 million so‘m to‘lab, 1,7 milliard so‘mini talon-toroj qilgan.
Mazkur holatlar yuzasidan Jinoyat kodeksining tegishi moddalari bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Surxondaryoda xususiy bog‘cha qurish uchun ajratilgan 356 mln so‘m kredit mablag‘i talon-toroj qilingani to‘g‘risida xabar berilgandi. Shuningdek, Toshkent viloyatida fermer xo‘jaligi 3,1 mlrd so‘m imtiyozli kredit mablag‘ini o‘zlashtirgani ma’lum bo‘lgan edi.
Izoh (0)