UzAutoMotors 8-may kuni yarim soatga bormay 4 500 dona Lacetti avtomobiliga shartnomalar tuzgandi. Kompaniya matbuot xizmatining ma’lum qilishicha, shu vaqt ichida UzAutoSavdo tizimi 120 dan ortiq kiberhujumga uchradi.
UzAutoMotors 8-may kuni soat 10:00 da 4 500 dona Lacetti avtomobiliga shartnoma ochilishini eʼlon qilgandi. Shu kuni soat 10:15 holatiga ko‘ra 4 400 dona Chevrolet Lacetti avtomobili uchun shartnoma tuzilgani ma’lum qilindi. Oradan yana bir necha daqiqa o‘tib, Chevrolet Lacetti avtomobillari uchun tuzilgan shartnomalar soni 4 500 taga yetdi.
Biroq, aksariyat kishilar bu vaqt davomida shartnomalar tuziladigan sayt deyarli ishlamaganini bildirmoqda.
Kompaniya matbuot xizmatining xabar qilishicha, Chevrolet Lacetti avtomobili uchun onlayn kontraktatsiya jarayonida UzAutoSavdo platformasida 1 sekund ichida 170 mingdan ortiq murojaat bilan ko‘p ulanishlar soni qayd etilgan. Taqqoslash uchun, Internet Live Stats maʼlumotlariga ko‘ra, Google qidiruv tizimi bir soniyada 99 mingga yaqin qidiruvlarni amalga oshiradi.
Ushbu vaqt ichida UzAutoSavdo tizimi 120 dan ortiq kiberhujumga uchradi, ammo ko‘rilgan choralar tufayli barcha kiberhujumlar oldi olindi.
Kontraktatsiya yakuniga ko‘ra, Chevrolet Lacetti avtomobilini xarid qilish uchun 4 500 ta shartnoma tuzildi. Tuzilgan shartnomalarning 99,9 foizi One ID tizimida ro‘yxatdan o‘tgan va 1 ta dan ko‘p bo‘lmagan avtomobil uchun shartnoma tuzgan jismoniy shaxslarga to‘g‘ri keladi.
Bundan tashqari, kompaniya yana bir bor mijozlarni ogoh va hushyor bo‘lishga va uchinchi shaxslar tomonidan to‘lov qilinmagan avtomobil shartnomalarini sotib olmaslikka chaqirdi.
“Agar siz bunday shartnomalarni sotib olsangiz, keyinchalik avtomobil sizga qayta rasmiylashtirilmasligining xavfi yuqori. Qolaversa, agar avtomobil egasining yaqin qarindoshlari (turmush o‘rtog‘i, farzandlari) sotishga ruxsat berishdan bosh tortgan taqdirda uni qayta ro‘yxatdan o‘tkazib bo‘lmaydi”, — deyiladi kompaniya xabarida.
Bunday kelishuvlar ishtirokchisi bo‘lganlar uchun UzAutoMotors xaridor oldida hech qanday javobgarlikni o‘z zimmasiga olmasligini bildirdi.
Izoh (0)