Nozik xilqat egasi hisoblangan ayolning jinoyat qilishiga ishongingiz kelmaydi. Afsuski, jamiyatda bilib-bilmay jinoyat yo‘liga kirgan va oilasidan uzoqda, guldek yoshligini panjara ortida o‘tkazayotganlar ham yo‘q emas. “Nadomat” loyihasining navbatdagi suhbatdoshi Havasxon Matboboyeva asli farg‘onalik, ammo ayni damda jazo muddatini 21-sonli ayollar koloniyasida o‘tamoqda. Suhbat davomida u qilgan ishidan pushaymonligi haqida kuyunib gapirdi.
Mahkuma — 30 yoshda. U Jinoyat kodeksining 131-moddasi 4-qismi bilan aybdor deb topilib, 3 yil muddatga ozodlikdan mahrum etilgan.
“Tug‘mas ayolning farzandiman”
— Onam birinchi turmushidan 15 yil yashab farzand ko‘rmagan. Ajrashib, ancha vaqtdan keyin dadamga turmushga berishgan ekan. Dadamning yoshi katta, ayoli o‘lgani uchun “tug‘mas ayol” deb onamga uylantirishgan ekan. Tug‘mas ayoldan men dunyoga kelgan ekanman. Opa-akalarim bor, ammo ona boshqa bo‘lgani uchun boshidan munosabatlari iliq bo‘lmagan.
Oilada erka qiz bo‘lganman. Ota-onam og‘zimdan chiqqanini muhayyo qilishgan. Turmushga chiqadigan paytim ham biroz injiq bo‘lganman. Ancha yigitlardan tanlab-tanlab, o‘zim bilan teng turmush o‘rtog‘imning taklifini qabul qilganman. Ikkita farzandli bo‘ldim shukr, ammo shu insonni tanlaganim hayotimdagi katta xatolarimdan biri bo‘ldi, deb hisoblayman, — deydi mahkuma.
“Ayolni eʼtiborsizlik o‘ldiradi”
— Oilada erkak o‘zi o‘rnini bilmasa, ayol ham bekaligini unutib qo‘yarkan. Turmush o‘rtog‘im yolg‘iz o‘g‘il bo‘lgan. Uni hamma erkalardi, og‘zidan chiqqani muhayyo edi. Ammo menga nisbatan bunday munosabatda bo‘lishmasdi. Erkak kishi qilish kerak bo‘lgan vazifalarni ham zimmamga yuklab qo‘yishardi.
Turmush o‘rtog‘imning menga bo‘lgan eʼtiborsizligi alam qilardi. Shu boisdan ham o‘zimga bo‘lgan ishonchim kundan kunga so‘nardi. Qaynopalarim Turkiyaga ishlagani ketishgani uchun ularning uyiga ijarachi qo‘yardik. Turmush o‘rtog‘imdan shu ish bilan o‘zi shug‘ullanishini so‘raganimda, “Ayol kishiga indolmaydi, erkak bilan tortishadi”, deb u ishga ham meni javobgar qilib qo‘yishgandi. Ana shu ijara bilan bog‘liq vaziyat hayotimni butunlay o‘zgartirib yubordi, — deydi mahkuma.
Ijarachining kutilmagan taklifi
— 2023-yilning 17-sentyabrida ijarachi yigit qo‘ng‘iroq qilib, “Opa, uyingizga ikki soatga odam qo‘yaylik” dedi. Qaynonam, qo‘ni-qo‘shnilarning oldida nima deyman dedim. Oradan ancha vaqt o‘tib, yana qo‘ng‘iroq qildi. “Opa, uy bo‘lmasa, bitta qiz topib berolmaysizmi? Boshqa viloyatdan tanish akaxonim kelayotgandi. Sizga ham menga ham pul kerak” dedi.
U avval qo‘shnimizning qizini ko‘rgan ekan. Uning ham yosh bolasi bor edi, bizning uyga tez-tez chiqib turardi. “O‘sha qiz-chi, uni gaplashib berolmaysizmi?” dedi. “U kasal, OITS” dedim. Hozir shifokor tanishi bilan maslahatlashib, telefon qilishini aytib go‘shakni qo‘ydi. Oradan ko‘p vaqt o‘tmay ijarachining akaxoni qo‘ng‘iroq qildi. “Shifokor bilan gaplashdim, himoyalansa, kasali yuqmas ekan”, dedi. Qizdan so‘rasam “600 ming deyavering, roziman” dedi. Bu orada ijarachi menga va o‘ziga ulush ham oladigan bo‘ldi. Oradan ikki soatlar vaqt o‘tib, qiz qo‘ng‘iroq qildi va ko‘chaga chiqishimni so‘radi. “Pulni tashlab ketmoqchimiz”, dedi. “Do‘konga berib ketavering, ertaga u-bu olarmiz”, desam chiqing deb qo‘ymadi. Majbur chiqdim va cho‘ntagimga pul soldi, shu payt yelkamdan kimdir turtdi. Qayrilib qarasam, maxsus xizmat xodimi hujjatlarini ko‘rsatib, meni jinoyat ustida qo‘lga olinganimni aytdi. Shokka tushib qoldim, men pulni qo‘limga ham olmagandim. 100 ming so‘m beramiz degandi, ammo cho‘ntagimga 300 ming solishgan ekan. U qiz o‘z xohishi bilan bu ishni qildi, desam ham foyda bo‘lmadi. U farzandli ayol bo‘lsa ham yosh jihatidan voyaga yetmagani uchun menga nisbatan jinoiy ish ochildi, — deydi mahkuma.
“Onamni ado qildim”
— Tergov harakatlari boshlanganida onamning uyiga kelgandik. Chunki bu ishdan keyin qaynonam kasalxonaga tushib qoldi, turmush o‘rtog‘im bilan munosabatlarimiz yanada yomonlashdi. Qamalganimdan keyin turmush o‘rtog‘im bolalarimni olib ketibdi. Avvaliga men bilan yaxshi gaplashib yurgandi, ammo oradan ko‘p vaqt o‘tmay huquqshunos menga turmush o‘rtog‘im ajrashishga qaror qilgani haqida aytdi. Undan keyin turmush o‘rtog‘imni uylangani va bolalarimga boshqa ayol qarayotgani haqida eshitdim.
Mayli, balki men u insonga munosib turmush o‘rtoq emasdirman, bolalarim ham bir kunini ko‘rayotgandir. Ammo 70 yoshga yaqinlashgan, o‘pka saratoni bilan og‘riydigan onamga achinaman. Nafaqa pulini menga ilinadi, uzoq yo‘ldan narsa ko‘tarib keladi. Hatto u olib kelganlarini yeyishga ham vijdonim qiynaladi. Onam darddan mushtdek bo‘lib qolgan, mendan ranjimaganini aytsa-da, vijdonim qiynaladi. Har kuni “Allohim, tezroq uch yil o‘tsa-yu, ota-onam va farzandlarim oldiga borsam. Ishqilib ota-onam o‘lib qolmasin, uchrashuvni qiyomatga qoldirmagin”, deb duo qilaman”, — deydi mahkuma.
Izoh (0)