Britan-Shved farmatsevtika kompaniyasi AstraZeneca o‘zining koronavirusga qarshi vaksinasini butun dunyo bo‘ylab sotuvdan qaytarib oladi. Bu haqda The Telegraph xabar berdi.
Kompaniya ixtiyoriy ravishda “marketing ruxsatnomasi”ni bekor qilganidan keyin vaksinadan endi Yevropa Ittifoqida foydalanish mumkin emas. Vaksinani bekor qilish to‘g‘risidagi ariza 5-mart kuni topshirilgan va 7-mayda kuchga kirgan. Shunga o‘xshash arizalar boshqa davlatlar va Buyuk Britaniyaga ham taqdim etiladi.
Avvalroq AstraZeneca koronavirusga qarshi vaksinasi o‘limga olib keladigan nojo‘ya ta’sirga egaligi, ya’ni tromb hosil qilishini tan olgandi. Oksford universiteti bilan hamkorlikda ishlab chiqilgan vaksina bemorlarga jiddiy zarar yetkazgani yoki o‘limga olib kelgani sababli kompaniyaga qarshi jamoaviy da’vo qo‘zg‘atilgan. Jabrlanganlar va marhumlarning yaqinlari AstraZeneca kompaniyasidan 100 million funt sterlinggacha (124 million 733 ming dollar) tovon puli talab qilmoqda.
Birinchi bor vaksinaning nojo‘ya ta’siri haqida 2021-yilda xabar berilgan. O‘shanda vaksina bilan emlanganlardan birida tromb hosil bo‘lib, miyasiga qon quyilgan. Bu esa organning tuzatib bo‘lmaydigan shikastlanishiga olib kelgan. Kompaniya vaksina trombni keltirib chiqarishi, ammo kamdan-kam hollarda ekanini tan olgan.
Izoh (0)