AQSH rasmiylari o‘tgan hafta G‘azo sektorining Rafah shahridagi harbiy amaliyotlar chog‘ida qo‘llanishi mumkinligidan xavotirlanib, Isroilga 3500 ta havo bombasi yetkazib berishni to‘xtatdi. Bu haqda tegishli manbalarga tayanib, CNN xabar berdi.
Xabarga ko‘ra, og‘irligi 2 ming funt (907 kg) bo‘lgan 1,8 ming dona bomba, shuningdek, 500 funt (taxminan 227 kg) bo‘lgan 1,7 ming bomba yetkazib berilishi to‘xtatilgan.
Biz, ayniqsa, G‘azoning boshqa qismlarida ko‘rganimizdek, 2000 funtlik bombalardan foydalanish masalasiga va ularning aholi zich joylashgan shaharlarga ta’siriga e’tibor qaratmoqdamiz, — deydi ismini oshkor etmagan rasmiy CNN telekanaliga.
The New York Times’ga ko‘ra, AQSH prezidenti Jo Bayden Isroil G‘azoda hujum boshlaganidan beri birinchi marta qurol-yarog‘ yetkazib berishni to‘xtatib turishdan siyosatga bosim sifatida foydalangan. AQSH maʼmuriyati kelajakda oddiy bombalarni aniq qurolga aylantira oladigan to‘plamlarni yetkazib berishni to‘xtatish masalasini ko‘rib chiqmoqda.
Avvalroq Axios portali ikki isroillik rasmiyga tayanib, Amerika maʼmuriyati 2023-yil 7-oktyabrdan beri ilk bor Isroilga o‘q-dorilar yetkazib berishni to‘xtatganini xabar qilgan edi. Bu harakat Isroil rasmiylarida jiddiy tashvish tug‘dirgan. 6-may kuni Oq uy Milliy xavfsizlik kengashining strategik aloqalar bo‘yicha koordinatori Jon Kirbi AQSHning Isroilga raketa yetkazib berishni to‘xtatgani haqidagi ma’lumotni tasdiqlashdan bosh tortgan.
Izoh (0)