Toshkent viloyati Olmaliq shahrida mayning ferma tashkil etgan xonadon aniqlandi. Bu haqda Bosh prokuratura huzuridagi departament xabar berdi.
Qayd etilishicha, departamentning Olmaliq shahar bo‘limi, DXX va IIB xodimlari hamkorligida tezkor tadbir o‘tkazilgan. Tadbirda fuqaro J.B. o‘z uyida tijorat maqsadida kompyuter tizimi orqali telekommunikatsiya tarmoqlaridan foydalangan holda uchta to‘plamdagi mayning kripto-aktivlari qurilmasini elektr tarmog‘iga to‘g‘ridan to‘g‘ri ulab, 103,1 million so‘mlik elektr energiyasidan noqonuniy foydalangani aniqlangan.
Mazkur holat yuzasidan Jinoyat kodeksining 169-moddasi (o‘g‘rilik) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq poytaxtda elektr energiyasiga noqonuniy tarzda ulanib, 1,5 milliard so‘mlik zarar yetkazgan mayning ferma aniqlangani to‘g‘risida xabar berilgandi. Shuningdek, Jizzaxda ikkita mayning ferma davlatga salkam yarim milliard so‘m zarar yetkazgani ma’lum bo‘lgan edi.
Izoh (0)