Rossiya hukumati Krasnodar viloyatining Tuapse shahrida ommaviy mushtlashuv uyushtirgan 15 nafar O‘zbekiston fuqarosi mamlakatdan chiqarib yuborilishini maʼlum qildi. Bu haqda “RIA Novosti” nashri xabar berdi.
Manbada aytilishicha, mushtlashuv uyushtirgan o‘zbekistonliklar mamlakatdan chiqarib yuborilishi haqida dastlab Krasnodar o‘lkasi prokuraturasi xabar tarqatgan.
1-may kuni internet tarmoqlarida ommaviy mushtlashuv tasvirlari paydo bo‘lgan edi. Unda bir guruh fuqarolar yo‘l bo‘yida mushtlashib, bir-biriga tan jarohati yetkazgan.
“2024-yil 24-aprel kuni Tuapse shahrida bo‘lib o‘tgan mushtlashuvda qatnashgan 15 nafar shaxs O‘zbekiston Respublikasi fuqarolari ekanligi aniqlandi. Barcha 15 nafar xorijiy fuqarolarga nisbatan maʼmuriy javobgarlikka tortish to‘g‘risida qarorlar qabul qilindi”, — deyiladi rasmiy xabarda.
Aniqlik kiritilishicha, qo‘lga olinganlar neftni qayta ishlash zavodida ish olib borayotgan tashkilot xodimlari bo‘lgan.
Izoh (0)