Qozog‘iston sobiq ichki ishlar vaziri, prezidentning sobiq maslahatchisi Yerlan Turg‘umboyev ikki oyga hibsga olindi. Bu haqda respublika Bosh prokuraturasi matbuot xizmati xabar berdi.
30-aprel kuni Ostona ixtisoslashtirilgan tergov sudi sobiq vazirga nisbatan ikki oy muddatga hibsga olish tarzidagi ehtiyot chorasini qo‘lladi. Turg‘umboyevning hibsga olinishiga oid boshqa ma’lumotlar Qozog‘iston Jinoyat protsessual kodeksining 201-moddasiga muvofiq oshkor etilmaydi. Tegishli modda dastlabki tergov ma’lumotlari ochiqlanishiga yo‘l qo‘ymaydi.
Yerlan Turg‘umboyev Qozog‘istonda 2022-yil yanvarida boshlangan norozilik namoyishlari bilan bog‘liq jinoiy ishlar bo‘yicha tergov doirasida 2024-yil 29-aprel kuni qo‘lga olindi. Bosh prokuratura Turg‘umboyev og‘ir oqibatlarga olib kelgan hokimiyat va mansab vakolatlarini suiiste’mol qilganlikda gumon qilinayotgani haqida xabar berdi. Jinoyat ishida “davlat sirini tashkil etuvchi ma‘lumotlar borligi sababli, tergovning boshqa maʼlumotlari oshkor etilmadi.
Izoh (0)