Dunyodagi eng zararli sabzavot qaysi? Gastroenterolog xulosasi

Shifokor-gastroenterolog Darya Utyumova organizm uchun eng zararli sabzavot bu kartoshka ekanligini aytdi, deb yozadi “Sports.kz” nashri.

Kartoshkaning barcha navlari yuqori glikemik indeksga ega. Glikemik indeks deganda biror mahsulot tarkibidagi uglevodlarning organizmda so‘rilishi va glyukozaga aylanish tezligini ko‘rsatadigan koeffitsient tushuniladi. Sabzavotlar orasida kartoshkada bunday indeks yuqori bo‘lib, uni ko‘p iste’mol qilish qondagi glyukoza miqdorining keskin oshishiga olib keladi va bu albatta organizmga salbiy ta’sir ko‘rsatadi, ­— deya ta’kidlaydi shifokor Utyumova.

Mutaxassis so‘zlariga ko‘ra, kartoshka oshqozon osti bezini ko‘p miqdorda insulin ishlab chiqarishga majbur qiladi va organizmda yog‘lar to‘planishiga sabab bo‘ladi. Shuning uchun qandli diabet va ortiqcha vazndan aziyat chekadigan insonlarga kartoshka iste’molini cheklash tavsiya etiladi.

Eslatib o‘tish joizki, mahsulotlarning glikemik indeksi qanday tarzda yetishtirilgani hamda tayyorlanganiga qarab bir-biridan farq qiladi. Masalan, kartoshka pyuresi tarkibida glikemik indeks pechda po‘stlog‘i bilan pishirilgan kartoshkaga nisbatan yuqoriroq, — dedi shifokor-gastroenterolog Darya Utyumova.