Uyquda vazn yo‘qotish endilikda millionlab insonlar uchun orzu emas. Olimlar yaxshi uyqu ozishda muhim ahamiyatga ega ekanligini allaqachon isbotlagan. Sog‘lom ozish asosida to‘g‘ri ovqatlanish, jismoniy mashqlar bilan birga to‘g‘ri tashkil etilgan uyqu turadi.
Tunda organizm kamroq energiya sarflaydi va metabolizm jarayoni sekinlashadi. Afsuski, uyquga to‘ymaslik qondagi qand miqdoriga ta’sir qiladi va insulin darajasini oshiradi. Bundan inson och qoladi va kaloriyalarni sarflash tezligi kamayadi. Shuning uchun kechasi taomlanish tavsiya etilmaydi. Shunga qaramay, organizmni foydali elementlar bilan ta’minlash uchun uyqudan avval ichish mumkin bo‘lgan ichimliklar mavjud. Quyida ozishga yordam beradigan ichimliklarni ko‘rib chiqamiz.
Zarchavali latte
Qahvaning o‘rnini bosadigan issiq sut va zarchava aralashmasini ta’bga ko‘ra turli ziravorlar bilan birga iste’mol qilish mumkin. Zarchava yallig‘lanishga qarshi, immunitetni mustahkamlovchi hamda ozdiruvchi xususiyatga ega bo‘lib, yog‘ to‘qimalarining ko‘payishiga to‘sqinlik qiladi. Shuningdek, ushbu ichimlik qondagi qand miqdorini me’yorga keltiradi. Lattega shirin ta’m berish uchun zanjabil, dolchin kabilar qo‘shish mumkin.
Qatiq
Qatiq ichakdagi mikroblarning to‘g‘ri muvozanatini, ovqat hazm qilish jarayonini yaxshilaydi, ichak infeksiyalari xavfini kamaytiradi, immunitetni mustahkamlaydi, oziq-ovqatdan muhim moddalarni o‘zlashtirishga yordam beradi. Shuningdek, qatiq uyqu sifatini hamda jismoniy mashqlar samaradorligini oshiradi.
Kerob kakaosi
Kerob ichakdagi toksinlar bilan kurashishga yordam beradigan minerallarga boy. Ular ovqat hazm qilishni yaxshilaydigan foydali bakteriyalarning ko‘payishiga imkon yaratadi. Kerobdan o‘ziga xos kakao tayyorlash mumkin. Buning uchun iliq sut, kerob va bir chimdim steviya o‘simligi kerak bo‘ladi.
Sut
Kalsiy va triptofanga boy sut melatonin ishlab chiqarishda faol ishtirok etadi va uyqu sifatini yaxshilaydi. Agar sizda laktozani hazm qila olmaslik kasalligi mavjud bo‘lsa, o‘simliklar asosida tayyorlangan maxsus sutni iste’mol qilishingiz mumkin.
Soya sutidan proteinli ichimlik
Proteinli ichimlik va oziq-ovqat mahsulotlari faqatgina sport bilan shug‘ullanuvchi shaxslar uchun mo‘ljallanmagan. Bunday ichimlik triptofan aminokislotasiga boy bo‘lib, kortizol gormoni (stress)ni kamaytirishga va ortiqcha vazn bilan kurashishga yordam beradi.
Lavandali choy
Lavanda o‘simligidan tayyorlangan damlama chuqur uyqu fazasi davomiyligini uzaytiradi va tananing uyqu vaqtida tiklanishiga yordam beradi. Dorixonada quritilgan lavanda yaproqlari sotib olayotgan vaqtda uning tarkibida qora va ko‘k choy kabi qo‘shimcha komponentlar bo‘lmasligiga ahamiyat bering. Lavanda choyi uyqudan 10-15 daqiqa avval issiq holda ichiladi.
Moychechakli choy
Tinchlantiruvchi va uyquni chaqiruvchi moychechakli choy sizga xotirjamlik hissini beradi va uyqu sifatini oshiradi. Uning tarkibidagi glitsin moddasi tanaga sedativ ta’sir qiladi va tanani bo‘shashtiradi.
Izoh (0)