“Jo‘rayevlardan menga hech narsa kerak emas”. Botir Qodirov otalikni belgilash masalasini nega aynan hozir ko‘targani haqida gapirdi (video)

Xonanda Botir Qodirov otalikni belgilash masalasini aynan hozir ko‘targaniga nima sabab bo‘lgani haqida so‘zlab berdi. 


— Shohjahonning Instagram sahifasidagi murojaatidan keyin Asakaga— otamning uyiga yo‘l oldim va amakim bilan ko‘rishib, bitta videomaterial tayyorlaganman. Biz ushbu videoni sudga taqdim etganmiz. Amakimning mening bolaligim haqidagi xotiralari hamda otamning o‘g‘li ekanligimni tasdiqlovchi dalillarni sudga taqdim etganmiz. Keyin amakim bilan Toshkentga qaytib, DNK tekshiruvini o‘tkazdik. 94 foiz amakimning jiyani bo‘lib chiqdim. Buni biz o‘zaro hal qilib, ukalarimga murojaat qilgandim. “Kelinglar, o‘zaro kelishib olaylik, buni ommaga chiqarmaylik. Sizlar mendan nima xohlayapsizlar?”, — degandim.

“Men sizlarga tegmadim. Mening otam o‘ldi, kelmasin, dedinglar kelmadim”. Janozaga ham kiritishmadi. Ko‘kcha masjidida kepka va ko‘zoynak taqib, oxirgi saflarda janozani o‘qidim. Men farzandlik burchimni ado etdim. Bu mening xohish istagim bo‘ldi, hech kim bilmasa-da, men borib ishtirok etdim. Jim yurgandim. Bular onamning sha’nini toptaydigan gaplar yozganidan keyin chidab tura olmadim. Biron joyda otamning qo‘shig‘ini aytsam, uyimga mualliflik huquqini buzganligim haqida xat keladi. Sizlarning qancha haqqingiz bo‘lsa, mening ham shuncha haqqim bor. Nima talashyapmiz? Kelinglar, gaplashib olaylik, dedim. Nega onamning sha’niga tegadigan gaplar yozyapsiz, bu gaplarni to‘xtating, dedim. Lekin ular quloq solishmadi. Shundan so‘ng men sudga murojaat qilishga majbur bo‘ldim, otalik faktorini belgilash maqsadida.  

Shuningdek, xonanda Jo‘rayevlardan unga hech narsa kerak emasligi haqida ham aytib o‘tdi. 

— Ko‘pchilik meni meros talashyapti deb o‘ylayapti. Lekin unday emas. Men ukalarimga xohlasa notarial tarzda ulardan menga hech narsa kerakmasligini yozib berishimni aytdim. Faqatgina videoni yoqib, “Bu inson bizni akamiz, uning onasi sha’niga noto‘g‘ri gaplar gapiribmiz”, deb berishlarini so‘radim. Ular buni xohlamadi. Shundan keyin O‘zbekiston fuqarosi sifatida sudga murojaat qilishga majbur bo‘ldim. Mening hamma narsam bor, o‘zimga yetarli. Ulardan hech narsa kerak emas. Sud uch oydan beri davom etyapti, lekin men bu narsani ochiqlamagandim. Bu narsani ommaga chiqarish kimga kerak bo‘lganini bilmayman. Menga konsertimdan oldin bu boshog‘riqlar kerak emasdi.

Botir Qodirovning intervyusini quyida tomosha qilishingiz mumkin: