Toshkent shahrining Yangihayot tumanida kreditini to‘lolmagan fuqaroning Tesla’si auksionga chiqarilmoqda. Bu haqda MIB “Daryo”ga xabar berdi.
Unga ko‘ra, byuroning Yangihayot tuman bo‘limi ish yurituvidagi Toshkent tumanlararo iqtisodiy sudining 2023-yildagi ijro varaqasiga asosan, qarzdor A.S.W. MCHJdan undiruvchi bank foydasiga jami 292 million 294 ming 523 so‘m kredit qarzdorligini undirish, undiruvni qarzdorga tegishli avtotransport vositasiga qaratish to‘g‘risidagi ijro hujjati bo‘lim ish yurituviga 18-mart kuni kelib tushgan.
Qarzdor tashkilotga ijro ishi yuritishni qo‘zg‘atish to‘g‘risidagi qaror yuborilgan bo‘lib, qarzdorlik belgilangan muddatda qarzdor tomonidan to‘lanmagani sababli davlat ijrochisi tomonidan majburiy ijro harakatlariga kirishilgan.
Olib borilgan majburiy ijro harakatlari jarayonida 16-aprelda garovdagi Tesla Model S85 avtotransport vositasi xatlandi va vaqtinchalik saqlash uchun jarima maydonchasiga qo‘yildi.
Hozirda mazkur avtotransport vositasini onlayn auksion savdolariga chiqarish choralari ko‘rilib, savdolardan tushgan pul mablag‘larining ma’lum qismi qarzdorlikni qoplash uchun bank foydasiga yo‘naltiriladi.
Izoh (0)