Rossiyada O‘zbekiston savdo uyi ochildi

Rossiyaning Ivanovo viloyatida O‘zbekiston Savdo-sanoat palatasining savdo uyi ochildi. Bu haqda palata matbuot xizmati xabar berdi.

Tantanali ochilish marosimida O‘zbekiston elchisi Botirjon Asadov, Ivanovo viloyati hukumati vakillari, Savdo-sanoat palatasi rahbariyati, shuningdek, mazkur viloyat ishbilarmon doira vakillari qatnashdi.

Savdo uyi O‘zbekiston va Rossiya hududlari o‘rtasida o‘zaro tovar ayirboshlash hajmini oshirish va hamkorlikni yo‘lga qo‘yish maqsadida tashkil etildi. Unda Made in Uzbekistan yorlig‘i ostidagi O‘zbekiston sanoatining keng assortimentidagi yuqori sifatli hamda raqobatbardosh mahsulotlari taqdim etiladi va sotiladi.

Ta’kidlanishicha, ushbu loyiha ikki davlat eksport-import bozorini diversifikatsiya qilish, O‘zbekiston va Rossiya tadbirkorlari hamda ishlab chiqaruvchilari uchun biznes imkoniyatlarini kengaytirishga xizmat qiladi.

Aprel boshlarida O‘zbekistonning Janubiy Koreyadagi savdo uyi ro‘yxatdan o‘tkazilgani to‘g‘risida xabar berilgandi. Shuningdek, Buyuk Britaniyaning London shahrida ham O‘zbekiston savdo uyi ochilishi kutilmoqda.