Jizzaxda xotini va o‘g‘liga zo‘ravonlik qilgan otaga nisbatan chora ko‘rildi. Bu haqda Oliy Majlisning Inson huquqlari bo‘yicha vakili matbuot xizmati xabar berdi.
Qayd etilishicha, ombudsmanga Jizzax viloyatidan B.O. nabirasiga otasi tomonidan bosim va zo‘ravonlik qilinayotgani bo‘yicha murojaat qilgan. Murojaatchining yozishicha, qizi K.S. 2022-yildan buyon Koreyada ishlaydi, uning 8 yoshli o‘g‘li esa erining qaramog‘ida qolgan. Murojaatga ilova qilingan videoyozuvda er-xotin videoqo‘ng‘iroq orqali janjallashganida, ota o‘g‘lining bo‘g‘ziga pichoq tiragani aks etgan. Shuningdek, ayol eri tomonidan ko‘p marotaba kaltaklangani va sog‘lig‘iga zarar yetgani haqida gapirgan.
Murojaat ombudsman tomonidan nazoratga olinib, holat uning Jizzax viloyatidagi mintaqaviy vakili hamda Ijtimoiy himoya milliy agentligi Jizzax viloyati boshqarmasi bilan hamkorlikda joyiga chiqib o‘rganilgan.
Aniqlanishicha, hozirda fuqaro K.S.ning voyaga yetmagan o‘g‘li buvisi bilan yashamoqda. Bola bilan suhbat o‘tkazilganda, ota-onasi o‘rtasidagi salbiy munosabatdan norozi ekanini, otasi bilan yashashni xohlamasligi hamda buvisi bilan qolishni istashini bildirgan. Shundan so‘ng, fuqaro K.S.ning voyaga yetmagan o‘g‘liga buvisi vaqtinchalik vasiy etib tayinlandi.
Ota esa voyaga yetmagan farzandiga nisbatan o‘ldirish yoki zo‘rlik ishlatish bilan qo‘rqitishda ifodalangan g‘ayriqonuniy harakatlari bilan Jinoyat kodeksining 112-moddasi (o‘ldirish yoki zo‘rlik ishlatish bilan qo‘rqitish) 1-qismida nazarda tutilgan jinoyatni qasddan sodir etganlikda ayblanib, jinoyat ishi qo‘zg‘atilgan.
Bundan oldin Toshkent viloyati Zangiota tumanida 13 yoshli qiz o‘gay onasi tomonidan muntazam zo‘ravonlikka uchrab kelayotgani aniqlangani, Zangiotada erkak 5 soat davomida xotinini kaltaklab, o‘ldirishga uringani to‘g‘risida xabar berilgandi.
Izoh (0)