O‘zbek dublyaj san’ati qiroli, O‘zbekiston xalq artisti Afzal Rafiqov “Mehmon TV” YouTube kanaliga bergan intervyusida boshidan kechirgan og‘ir kasallik tufayli mashhur ovozidan ayrilgani hamda bugungi kundagi faoliyati haqida so‘zlab berdi.
— Ochig‘ini aytadigan bo‘lsam, ovozimda muammolar paydo bo‘lgan. Aktyor uchun tashqi ko‘rinishdan keyin ovoz ikkinchi o‘rinda turadi. Ayniqsa teatr aktyori uchun bu juda muhim. Teatrda jonli muloqot bo‘lgani uchun ovoz birinchi qatorda o‘tirganga ham, oltmishinchi qatorda o‘tirganga ham birdek yetib borishi kerak. So‘zni eltadigan bu ovoz. Hayotimning so‘ngida xudoyim yana bir sinov berdi: ovozim xasta bo‘lib qoldi. Lekin shunga qaramay taslim bo‘lganim yo‘q: harakat qilyapman. Spektaklni ham o‘ynayapman, sahnada, mana shu ovoz bilan. Teatr rahbariyatiga rahmat, kichkina mikrofon topib berishgan, o‘sha mikrofonni taqib o‘ynayapman rolimni. Buni qarangki, dublyajda ham menga hech kim “Afzal aka, rahmat, shuncha yil xizmat qildingiz, endi bo‘ldi”, demayapti. Haligacha dublyajda ham ishlayapman. Yaqinda jadidchilik harakatiga bag‘ishlangan filmda kadr orti matnlarini o‘zbek va rus tillarida o‘qib berdim, — deydi aktyor.
Afzal Rafiqov o‘zi ovoz bergan eski filmlarini ko‘ra olmasligi haqida ham aytib o‘tdi.
— Meni o‘zimga buni qabul qilish qiyin. Sababi oldingi ovozim esimda. Telekanallarda oldingi film va seriallarni berib qolishadi. Ularni ko‘rish men uchun qiyin. Hozirgi ahvolim mana shu. Lekin o‘zimga ish topishga harakat qilyapman. Boshqa nima kerak aktyorga? Boshimga shunday kulfat tushirgani bilan Allohim menga ishlash imkoniyatini qoldirdi.
Aktyor ovozi yo‘qolishiga sabab bo‘lgan xastalik haqida so‘zlab berdi.
— Menda ovozim yo‘qolishiga ovoz pardamdagi muammo sabab bo‘ldi. Chap ovoz pardamda kasallik aniqlandi. Jarrohlik amaliyotiga ko‘nishga majbur bo‘ldim. Faqat shu usul bilan kasallik bartaraf etildi. Chunki muolaja bilan hech kim nafaqat ovozimga, balki jonimga ham kafolat bermadi. U faqat ovozimga emas, balki jonimga ham tahdid qilgan kasallik edi. Hamkasbim G‘aybulla Hojiyevga ham shunday sinov berilgandi. U ham ancha kurashdi, taslim bo‘lmadi. Yaxshi inson edi, joyi jannatdan bo‘lsin, — deydi aktyor.
Izoh (0)