“O‘rgimchak odam: Uyga yo‘l yo‘q”, “Dyuna” filmlari bilan muxlislarga tanish bo‘lgan aktrisa Zendaya yo‘l harakati qoidalarini buzgani uchun jarimadan Tom Holland tufayli qutulib qolgan. Bu voqea haqida u Jimmi Kimmel bilan kechki shoudagi suhbatda so‘zlab berdi.
Ko‘rsatuv boshlovchisi aktrisadan tezlikni oshirgani uchun biror marta jarimaga tortilgani haqida savol berdi. Zendaya bunday bo‘lishiga oz qolganini, ammo unga aktyor Tom Holland yordam berganini aytdi.
“Tom bilan onamning sport mashg‘ulotlariga ketayotgan edik. Kechikayotganimiz uchun tezlikni biroz oshirdim va bizni politsiyachilar to‘xtatdi. Ular Tomni ‘O‘rgimchak odam’ filmidan tanib qoldi va bizga jarima yozmadi. Men ogohlantirish oldim va yo‘lda davom etdim”, — dedi Zendaya.
Aktrisa so‘nggi marta “Da’vogarlar” filmida suratga tushdi. Jastin Kuritzkes ssenariysi asosida Luka Guadagnino tomonidan suratga olingan badiiy filmda Zendaya, Mayk Feyst va Josh O’Konnor bosh rollarni ijro etdi.
The Hollywood Reporter xabar berishicha, Metro-Goldwyn-Mayer kompaniyasi “Da’vogarlar” filmining premyerasini 2024-yil 26-aprelga ko‘chirdi. Dastlab film 2023-yil 15-sentyabrda chiqishi kerak bo‘lgan. Film kechikishiga 13-iyul kuni AQSH aktyorlari gildiyasi ish tashlash boshlanganini e’lon qilgani sabab bo‘ldi.
Izoh (0)