HAMAS harakati siyosiy byurosi yetakchisi Ismoil Haniya Turkiya prezidenti Rajab Toyyib Erdo‘g‘on bilan uchrashish uchun Istanbulga keldi. Bu haqda Anadolu nashri xabar berdi.
Manbada aytilishicha, ikki siyosiy rahbar o‘rtasidagi uchrashuv va muzokaralar Dolmabaxche saroyida, yopiq eshiklar ortida o‘tkazilgan. Turkiya rasmiy nashrlari muzokaralarning asosiy tafsilotlarini hozircha maʼlum qilmagan.
17-aprel kuni Turkiya tashqi ishlar vaziri Xoqon Fidan Dohada Ismoil Haniya bilan uchrashib, G‘azodagi so‘nggi mojaroni muhokama qilgani haqida xabar berilgan edi. Fidan va Haniya uchrashuvda G‘azo sektoriga gumanitar yordam ko‘rsatish, o‘t ochishni to‘xtatish, shuningdek, garovga olinganlarga oid masalalarni ko‘rib chiqqan.
Turkiya rahbariyati HAMAS yetakchisi tashrifi mamlakat uchun katta maʼno anglatishini maʼlum qilgan. Uchrashuv bosh mavzularidan biri Falastinning BMT aʼzoligiga qabul qilinishi bilan bog‘liq bo‘lishi mumkin.
Isroil davlati, xalqaro sudning vaqtinchalik qarorini buzgan holda, G‘azo sektoriga hujumini davom ettirmoqda. Falastin sog‘liqni saqlash idoralari maʼlumotlariga ko‘ra, 7-oktyabrdan beri kamida 34 049 falastinlik, asosan, ayollar va bolalar halok bo‘lgan. 76 901 nafar fuqaro jarohatlangan.
Isroilga nisbatan Xalqaro sud genotsid ayblovini eʼlon qilgan. Yanvar oyida chiqarilgan qaror Tel-Avivga genotsid harakatlarini to‘xtatish va G‘azodagi tinch aholiga gumanitar yordam ko‘rsatilishini kafolatlash choralarini ko‘rishni buyurgan. Biroq jangovar harakatlar to‘xtovsiz davom etmoqda.
Izoh (0)