17-aprel kuni Viktoriya o‘zining 50 yoshini nishonladi. Tug‘ilgan kun sharafiga Posh Spice qanday qilib bir vaqtning o‘zida ham ishbilarmon ayolga, ham haqiqiy moda timsoliga aylangani haqida gaplashamiz.
19 yoshli Viktoriya Adams qizlar guruhi uchun kasting bo‘layotgani haqida telefon orqali bilib qoladi. “Keyin men gazetadagi e’lonni ko‘rdim, unda yangi guruhga qo‘shiq aytishni va raqsga tushishni yaxshi ko‘radigan tajribali, ekstrovert qizlar kerak, deb yozilgandi”, — deydi u. Aslida Viki qo‘shiq aytishni jiddiy qabul qilmagan, ammo yosh qiz bunday imkoniyatni qo‘ldan boy berishni xohlamaydi: Adams Londonga ko‘chib o‘tishni juda xohlagan. Bundan tashqari, Viktoriya balet maktabi, teatr kollejida tahsil olgandi.
1999-yilda esa Viktoriya Adams Viktoriya Bekhemga aylanadi. Oradan 20 yil o‘tgan bo‘lsa-da, hozirda Bekhem shunchaki ajoyib familiya emas, uning orqasida sayyoradagi eng mashhur futbolchining katta oilasi turadi. Bekhem juda kuchli brend bo‘lib, u har qanday mahsulotni sotishga qodir: kiyim-kechak kolleksiyasidan tortib shotland viskisigacha.
Ko‘p jihatdan, bu muvaffaqiyat Bekhemlar oilasining boshlig‘i Devidning xizmatlaridir, ammo uning sevimli rafiqasi Viktoriyaning ajoyib muvaffaqiyatisiz bunga erishib bo‘lmasdi.
Xatolarini tan olishni biladi
Viktoriyaning avvalgi uslubi hech qachon ideal bo‘lmagan. Karyerasining boshida, ya’ni Spice Girls davrida Adams xonim “oligarxning rafiqasi” obrazidan uquvsizlarcha foydalangan: kalta va tor liboslar, yorqin olmoslar, mukammal dazmollangan sochlar, yorqin makiyaj va, albatta, baland poshnali tuflilar.
Negadir men lateksdan tikilgan kostyumlar kiyishni odatiy hol deb hisoblardim. Romeoga homiladorligimda ham doimo poshnali tuflilarda yurardim. To‘qqiz oylik homiladorligimda Disneylendni “labuten”da aylanganimni eslayman, — deydi u.
Keyinchalik Viktoriya implantlaridan xalos bo‘ladi, terisidagi avtozagarini ketkazadi va barcha tor kiyimlarini tashlab yuboradi. Buning o‘rniga katta o‘lchamdagi, yorqin bo‘lmagan kiyimlarga ustunlik beradi. Hatto Yelizaveta II ham Viktoriyaning moda sohasidagi yutuqlarini yuqori baholaydi va nabirasi Uilyam orqali Bekhem xonimga Britaniya imperiyasining ordeni va zobiti unvonini topshiradi.
O‘zining kuchli tomonlarini ta’kidlay oladi
Viktoriya o‘zining osongina tanib olinadigan uslubini yaratdi. Qaysidir ma’noda Viktoriya Bekhemni Koko Shanel bilan solishtirish mumkin: mashhur fransuz ayoli burjua modasiga ergashish uchun imkoniyatga ham, mablag‘ga ham ega bo‘lmasa-da, butun dunyo unga ergashdi. Viktoriyaning puli ham, xohishi ham yetarli edi. Unga faqat yetishmayotgan narsa o‘ziga xoslik bo‘lgan.
Viktoriya past bo‘yli (165 santimetr) bo‘lgani uchun ham baland poshnali poyabzallarda yurgan. Bekhem xonim birinchi oyog‘i sinishigacha poshnali tuflilarda yurishni davom ettirish o‘rniga, bo‘yining pastligi uning xususiyati, qadr-qimmati va kuchi ekanligini tushunadi. Buni poshnali tufli bilan ko‘tarishning hojati yo‘q — u o‘zini o‘zi boricha qabul qiladigan ayolga aylanadi.
Hozirda u nozikligini butunlay boshqa turdagi kiyimlar bilan ta’kidlaydi. Mini uzunlikdagi yubkalar uzunlashib, to‘kilib turuvchi midiga aylandi, platformali poshnalar uzun etiklarga, ko‘zlari atrofini smoki uslubida bo‘yash esa terining tabiiy yorqinligiga o‘z o‘rnini bo‘shatib berdi. Ammo Bekhem xonimning liboslaridagi bir narsa o‘zgarishsiz qolmoqda — bu uning quyoshdan saqlaydigan katta ko‘zoynaklarga bo‘lgan muhabbati: bu aksessuar quyoshdan ham, paparatssilarning kameralaridan ham mukammal himoya qiladi.
Kechirishni biladi
Yosh, chiroyli, muvaffaqiyatli janob Bekhem va Bekhem xonim 2000-yillarda namunali oiladek tuyulardi. Biroq Devidning xiyonati bilan bog‘liq oilaviy muammolar bor edi.
Birinchi xiyonat to‘ylaridan besh yil o‘tib yuz beradi: 2004-yilda Devid shaxsiy yordamchisi Rebekka Lus bilan Viktoriyaga xiyonat qilgan. Ammo Devid rafiqasi bilan ajrashishni xohlamaydi. Viktoriya ham hisobsiz ko‘z yoshlaridan so‘ng, bevafo erini kechiradi.
Devidning ikkinchi xiyonati uch yildan keyin oshkor bo‘ladi. Bu safar bosh qahramon Irma Nichi edi. Qiz Devid bilan munosabatlarini yashirmaslikka qaror qiladi va Bekhem bir kecha uchun 10 ming dollar to‘laganini aytadi. Uning so‘zlariga ko‘ra, bu munosabt bir kechada tugamagan, balki ular o‘rtasidagi romantikaga aylangan.
Keyinchalik ma’lum bo‘lishicha, uning so‘zlari uydirma bo‘lib, bu munosabatlar sud jarayoni bilan yakunlangan. Odatda bunday hikoyalarda sodir bo‘lganidek, futbolchi va qo‘shiqchining nikohi saqlab qolinadi, Nichining obro‘si to‘kilgani qoladi, xolos.
Hech kim turmush qurish oson, deb aytmagan. Muammolar Devid bilan hikohimizni yanada mustahkamladi, — deydi Viktoriya va eri tarafini oladi.
Boshqalarning fikriga e’tibor bermaydi
Viktoriya boshqalar u haqida nima deb o‘ylashiga ahamiyat bermaydi — bu uning muvaffaqiyatining asosiy sirlaridan biri. So‘nggi 20 yil ichida matbuot mumkin bo‘lgan hamma narsa uchun uni tanqid qildi: anoreksiya targ‘iboti va juda nozik modellar bilan ishlashdan tortib qizi Xarperni tarbiyalashda gender stereotiplarigacha.
Bekhem tanqidchilarining yana bir sevimli nishoni — uning hissiz yuz ifodasidir. Viktoriyani faqat internetdagi fotosuratlardan taniydiganlar uni butun oilasini ochlikda saqlaydigan va qattiqqo‘llik qiladigan sovuq, hissiyotsiz ayol deb o‘ylashadi. Viktoriya haqiqatan ham ko‘p tabassum qilmaydi, lekin buni jiddiy qabul qilmaslik kerak: Viktoriyaning o‘zi uning bunday yuz ifodasi obrazining detallaridan biri ekanini aytadi.
Men ichimda doim tabassum qilaman. Lekin tashqi ko‘rinishimda bunday bo‘lolmayman, moda olamidagi hamkasblarim oldidagi majburiyatlarim bor, — deydi u.
Aktrisa Yeva Longoriya dugonasini himoya qiladi: Aslida u juda quvnoq. U juda ko‘p tabassum qiladi va eng muhimi, meni ham kuldira oladi.
Yangiliklarni sinab ko‘rishdan qo‘rqmaydi
Viktoriyaning qo‘shiqchilik karyerasi, Spice Girls’ning boshqa yetakchi xonandalaridan farqli o‘laroq muvaffaqiyatli bo‘lmagan bo‘lsa ham, hozir u eng mashhur nomga ega. Buning siri nimada? Viktoriya faqat musiqaga e’tibor bermasdan, o‘zini boshqa sohalarda sinab ko‘rishdan tortinmadi.
Avvalo Posh Spice moda dizayneri sifatida tanildi. Uning arsenalida nafaqat o‘zining Victoria Beckham brendi, balki Viktoriya Bekhemning ikkinchi, demokratik yo‘nalishdagi Victoria by Victoria Beckham ham mavjud. Brend o‘z tarixini 10 yil oldin, Viktoriya kechki liboslar to‘plami Victoria Beckham Collection’ni taqdim etganida boshlangan edi. Ammo bundan oldin ham Viki eri bilan dVb — David and Victoria Beckham nomi ostida ichki kiyimlar, jinsi shimlar va parfyumeriya ishlab chiqaradigan brend yaratgandi.
Avvaliga tanqidchilar bu g‘oyaga shubha bilan qarashadi: “Mana, yana bir yulduz o‘zini dizayner deb e’lon qildi!”. Viktoriya boshida juda ko‘p pul va mashhur nomga ega edi, lekin u biznes muvaffaqiyatli bo‘lishiga ishonchi komil emasdi. Bekhem xonimning baxtiga uning shaxsiy dizaynlari yuqori baholandi. Bugungi kunda uning uslubi yaxshi sotilmoqda: nufuzli Business of Fashion nashriga ko‘ra, Viktoriya Bekhem brendi 100 million dollarga baholangan.
Shuningdek, Viktoriya bir nechta parfyumeriya chiqardi, kitob yozdi, hatto mashina modelini loyihalashtirdi. Bundan tashqari, Bekhem zargarlik buyumlari tarmog‘ini ishlab chiqdi va 2017-yil oxirida u Estée Lauder uchun dekorativ kosmetika to‘plamini chiqardi.
Bugungi kunda Bekhem xonimning mashhurligi “futbolchining rafiqasi” maqomidan ham oshib ketdi, asosiysi esa barcha yutuqlarini o‘z mehnati bilan qo‘lga kiritdi. Ishlaridan tashqari eri va to‘rt farzandi — Bruklin, Romeo, Kruz va Xarper uchun ham vaqt topishi esa tahsinga sazovor.
Izoh (0)