Toshkentdagi Abdulla Qodiriy va “Do‘stlik” bog‘lari qayta ta’mirlanadi. Buning uchun investor kamida 20 million dollar sarflaydi

Toshkent shahridagi Abdulla Qodiriy va “Do‘stlik” bog‘lari qayta ta’mirlanib, aholi foydalanishi uchun zamonaviy ko‘rinishga keltiriladi. Bu haqda shahar hokimligining qarori ham mavjud. Har ikki bog‘ rekonstruksiyasiga kamida 20 million dollar kiritayotgan investorlarning OAV vakillari bilan uchrashuvida bildirilishicha, ayni paytda tashlandiq holatdagi bog‘lar 2026—2027-yillarga borib G‘afur G‘ulom bog‘i kabi aholining eng sevimli maskanlaridan biriga aylanadi. 

Maqsadimiz — har ikki bog‘ni ham bog‘ sifatida saqlab qolish. Yashilligini asrashdan iborat. Biz shu ishga kirishmasak, tashlandiq, egasiz bo‘lib yotgan bog‘da ko‘p o‘tmay ko‘p qavatli uylar ko‘tarilishi ham hech gap emas, — deydi loyiha tashabbuskorlaridan biri, BMP Smart Decision Management direktori o‘rinbosari Zafar Mirzaulukov. 

Ta’kidlanishicha, Toshkent shahri hokimining 2024-yil mart oyidagi qaroriga ko‘ra, har ikki bog‘ BMP Smart Decision Management O‘zbekiston-Singapur qo‘shma korxonasiga 49 yil muddatga, har bir istirohat bog‘iga kamida 10 million dollar investitsiya kiritish sharti bilan ijaraga berilgan. 

2023-yil may oyida barcha daraxtlari va yashil maydonlari saqlab qolingan G‘afur G‘ulom bog‘iga ta’mirlanishidan avval 30 ming nafar fuqaro borgan bo‘lsa, ta’mirlanib, zamonaviy ko‘rinishga kelganidan so‘ng bog‘ga keluvchilar 60 ming nafarga yetdi. Biz aynan G‘afur G‘ulom bog‘i namunasida har ikki bog‘ni ham shunday maskanga aylantirmoqchimiz, — deydi tadbirkor.

Bildirilishicha, Abdulla Qodiriy va “Do‘stlik” bog‘larining G‘afur G‘ulom parkidan asosiy farqi uning tinch va sokin maskan bo‘lishi hisoblanadi. 

G‘afur G‘ulom bog‘iga 12 million dollar sarmoya sarflab, 43 ta yangi attraksion o‘rnatgandik. Ayni kunda bog‘da 300 dan ortiq ish o‘rni mavjud. Oyiga davlatga 11 milliard so‘m soliq to‘laymiz. Bog‘dagi daraxtlarni saqlab turish uchun har oy 680 million so‘m xarajat qilinadi. Ammo bu ikki bog‘imiz G‘afur G‘ulomdan farqli ravishda, bu yerda attraksionlar kam bo‘ladi. Bog‘ shovqin-surondan holi, tinch maskan qilinishi ko‘zda tutilgan, — deydi Zafar Mirzaulukov. 

Toshkent shahri hokimi o‘rinbosari Furqat Mahmudxo‘jayevning jurnalistlarga bildirishicha, shahar hokimligi mahalliy byudjetdan qo‘shimcha mablag‘ ajratib, har ikki bog‘ni ham ta’mirlab, zamonaviy ko‘rinishga keltirishga qodir emas. Boisi shundoq ham xarajatlar ko‘p. Shu sabab bu ishga investorlar jalb qilinib, ularning yordamida bog‘ni asrab qolish hamda aholiga qulaylik yaratish masqadi ko‘zlangan. 

Biz Eski shahar aholisi oilaviy bo‘lib keladigan zamonaviy shahar yaratmoqchimiz. Shuningdek, uni “Chorsu” bozori bilan bitta sayyohlik klasteriga birlashtirmoqchimiz. Hozirgi kunda shaharda bir vaqtning o‘zida barcha milliy taomlarni zamonaviy formatda tatib ko‘rish imkoni yo‘q. Biz shuni amalga oshirib, bog‘ning asosiy nuqtalaridan biriga aylantirmoqchimiz. Bog‘ni har ikki hududga ham suqilib kirishga urinayotgan quruvchi tadbirkordan himoya qilib, bog‘da hech qanday qurilish ishlari amalga oshirilmasligiga erishmoqchimiz. Biz buni G‘afur G‘ulom parki misolida isbotladik, — deydi qo‘shma korxona direktori Otabek Mirzajonov. 

Press-tur davomida qo‘shimcha qilinishicha, Yakkasaroy tumanidagi sobiq Bobur, ayni kunda “Do‘stlik” bog‘i deb atalayotgan hududda shou va konsertlar uchun amfiteatr qayta tiklanadi. Bog‘da, shuningdek, shaxmat maydonchasi, yoga va vorkaut zonasi, bir nechta bolalar maydonchalari paydo bo‘ladi. 

Bog‘ yonidagi Bratislava ko‘chasining O‘zbek tili va adabiyoti universitetidan Konstitutsiya ko‘chasigacha bo‘lgan qismi yopilib, ovqatlanish maydoni bor piyodalar hududi tashkil etiladi. Biz har ikki bog‘da ham birorta daraxt kesilmasligiga, yashillikka putur yetmasligiga va’da beramiz. Buni nafaqat OAV vakillari, jamoatchlik ham kuzatib ko‘rib borishi uchun yetarli darajada ochiqmiz. Barcha savollarga javob berishga tayyormiz, — deydi qo‘shma korxona direktori Otabek Mirzajonov.