Davlat xavfsizlik xizmati xodimlari tomonidan Sirdaryoda elektr energiyani talon-toroj qilgan mayning ferma aniqlandi.
Qayd etilishicha, DXXning Sirdaryo viloyati bo‘yicha boshqarmasi xodimlari tomonidan Iqtisodiy jinoyatlarga qarshi kurashish departamenti, viloyat ichki ishlar boshqarmasi, “O‘zenergoinspeksiya” hamda “Hududiy elektr tarmoqlari korxonasi” AJ bilan hamkorlikda o‘tkazilgan tezkor tadbirda noqonuniy mayning ferma faoliyatiga chek qo‘yilgan.
Xususan, Sirdaryo tumanidagi chorvachilikka ixtisoslashgan masʼuliyati cheklangan jamiyat binosida xorijdan keltirilgan jami 107 dona INNOSILICON T3, Whatsminer M21S va ANTMINER S9 BITMAIN qurilmalaridan foydalanib, kriptovalyuta ishlab chiqarish bilan shug‘ullanilgan.
Aniqlanishicha, ushbu maqsadda 2022-yilning aprel oyidan 2024-yilning mart oyiga qadar MCHJga qarashli elektr hisoblagichning ikkilamchi zanjirini vaqti-vaqti bilan uzib, haqiqatda oqib o‘tayotgan quvvatni yashirish orqali hisoblagich ko‘rsatkichini sunʼiy kamaytirish yo‘li bilan elektr energiyasidan noqonuniy foydalanilishi natijasida davlat manfaatlariga 34 milliard 367 million so‘m miqdorida zarar yetkazilgan.
“Agarda MCHJ rahbarlari tomonidan talon-toroj qilingan 39,3 million kVt elektr energiyasidan oqilona foydalanilganida, viloyatning Boyovut, Sardoba, Oqoltin va Guliston tumanlari aholisining bir oylik ehtiyojini qoplash mumkin edi”, — deyiladi xabarda.
Hozirda MCHJning mansabdor shaxslariga nisbatan Jinoyat kodeksining 169-moddasi (o‘g‘rilik) 4-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.
Avvalroq poytaxtda elektr energiyasiga noqonuniy tarzda ulanib, 1,5 milliard so‘mlik zarar yetkazgan mayning ferma aniqlangani to‘g‘risida xabar berilgandi. Shuningdek, Jizzaxda ikkita mayning ferma davlatga salkam yarim milliard so‘m zarar yetkazgani ma’lum bo‘lgan edi.
Izoh (0)