Shavkat Mirziyoyevning Tojikiston Respublikasiga davlat tashrifi arafasida 17-aprel kuni Dushanbe shahrida O‘zbekiston-Tojikiston investitsiya biznes-forumi bo‘lib o‘tdi.
Tadbirga Tojikiston bosh vaziri o‘rinbosari Usmonali Usmonzoda va O‘zbekiston bosh vaziri o‘rinbosari Jamshid Xo‘jayev hamraislik qildi. Forumda, shuningdek, ikki mamlakat ishbilarmon doiralarining 600 dan ortiq vakillari, vazirlik va idoralar, tarmoq birlashmalari va viloyat hokimliklari rahbarlari ishtirok etdi.
Jamshid Xo‘jayev o‘zining qutlov so‘zida ikki davlat rahbarlari o‘rtasidagi ishonch tufayli so‘nggi yillarda sezilarli darajada mustahkamlangan ko‘p qirrali o‘zaro hamkorlikning strategik darajasini alohida taʼkidladi.
O‘zaro tovar ayirboshlash hajmi oshgani qayd etildi. So‘nggi sakkiz yilda O‘zbekiston va Tojikiston o‘rtasidagi tovar ayirboshlash hajmi 3 barobar oshib, 2023-yilda 750 million dollarga yetdi, yil boshidan esa yana 40 foizga oshdi. Shu bilan birga, ikki mamlakat iqtisodiyoti salohiyatini hisobga olgan holda, yaqin yillarda o‘zaro tovar ayirboshlash hajmini 2 milliard dollarga yetkazish bo‘yicha yangi ulkan maqsadlar eʼlon qilindi.
Investitsiyaviy hamkorlik sohasida salmoqli natijalar kuzatilmoqda – bugungi kunda ikki davlat hududida 370 dan ortiq qo‘shma korxona faoliyat ko‘rsatmoqda, vaholanki, 2017-yilda ularning soni atigi 17 tani tashkil etgan edi.
Xo‘janddagi “Zelal-tex” ip-kalava va tayyor to‘qimachilik mahsulotlari ishlab chiqarish korxonasi hamda Dushanbe shahridagi “Artel” maishiy texnika ishlab chiqarish korxonalari muvaffaqiyatli loyihalar qatoridan joy olgan. “Oybek-Fotexobod” chegara punkti va “Andarxon” savdo-logistika markazida savdo zonasini tashkil etish, Tojikistonning Zarafshon daryosida ikkita GES qurish kabi salmoqli qo‘shma loyihalarning amalga oshirish ishlari faol olib borilmoqda.
Hamkorlikda ishlash va qo‘llab-quvvatlash tajribasiga asoslanib, munosabatlarni rivojlantirishning eng ustuvor yo‘nalishlari, xususan: metallurgiya va tog‘-kon sanoati, mineral-xomashyo resurslarini o‘zlashtirish va qayta ishlash, shamol va quyosh energetikasini rivojlantirish, gidroenergetika, mashinasozlik va elektrotexnika mahsulotlari ishlab chiqarish, agrosanoat kompleksi va yengil sanoat kabi sohalar belgilab olindi. Mamlakat hukumati yangi sarmoyaviy loyihalarga har tomonlama yordam ko‘rsatishga to‘liq tayyor ekanligi bildirildi.
O‘z navbatida, Tojikiston Bosh vazirining o‘rinbosari Usmonali Usmonzoda ham savdo, sarmoyaviy va sanoat kooperatsiyasi sohasidagi hamkorlikni rivojlantirish salohiyatini yuqori baholadi va ikki mamlakat ishbilarmon doiralari vakillarini faol hamkorlik qilishga, sheriklik aloqalarini o‘rnatishga chaqirdi.
O‘zbekiston-Tojikiston sarmoyaviy kompaniyasining roli alohida taʼkidlandi, uning resurslaridan foydalanish uchun umumiy qiymati 135 million dollar bo‘lgan 14 ta loyiha ro‘yxati shakllantirildi.
Biznes-forum yakunlari bo‘yicha hujjatlar to‘plami imzolandi, ular asosida har bir loyihani amalga oshirishning aniq ijrochilari va muddatlarini o‘z ichiga olgan “Yo‘l xaritasi” ishlab chiqiladi.
Foto
Izoh (0)