“Bayer”ni chempion bo‘lishi uchun Xabi Alonsoga 557 kun kerak bo‘ldi: klub murabbiyi 2022-yilning 5-oktyabrida jamoani qabul qilib oldi. O‘shanda “Bayer” turnir jadvalida 17-o‘rinni egallab, so‘nggi o‘rinlarda borayotgan edi.
Natijada leverkuzenliklar 2022—23-yilgi mavsumni Germaniya chempionatida 6-o‘rinda yakunladi. “Bayer” Alonsoning birinchi mavsumida ham Yevropa Ligasining yarim finaliga chiqdi, biroq “Roma”ga mag‘lub bo‘ldi. Jamoa hozirda Alonso qo‘l ostida ikkinchi mavsumni o‘tkazmoqda.
2024-yilning 14-aprelida (murabbiy tayinlanganidan 557 kun o‘tib) “Bayer” Bundesliga chempionligini qo‘lga kiritdi. Bundan tashqari, joriy mavsumda jamoa Germaniya kubogi finaliga yo‘l oldi va u yerda 25-may kuni "Kayzerslautern" bilan uchrashadi. “Bayer” Yevropa Ligasi kubogi uchun ham da’vogarlardan biri bo‘lib qolmoqda. Birinchi chorak final o‘yinida leverkuzenliklar “Vest Hem”ni mag‘lub etdi (2:0). Javob o‘yini 18-aprel kuni bo‘lib o‘tadi.
2020-yilda Joze Mourinyo o‘z intervyusida Alonsoning murabbiy sifatida kelajagiga ishonch bildirgan. O‘sha paytda Xabi “Real Sosedad” jamoasining 14 yoshgacha bo‘lgan futbolchilar murabbiyi sifatida ishlayotgan edi.
“U mendan yaxshiroq futbolchi bo‘ldi. Uning maydonni ko‘rish qobiliyati juda yuqori. U Gvardiola, Anchelotti, Benites va men kabi yaxshi murabbiylar bilan birgalikda ishladi. Shuning uchun, u juda yaxshi murabbiy bo‘lishiga ishonaman”, — degan edi Mourinyo.
Izoh (0)