“An-Nassr”ning portugaliyalik hujumchisi Krishtianu Ronaldu Saudiya Arabistoni Superkubogi yarim finalida “Al-Hilol”ga qarshi o‘yinda (1:2) qizil kartochka olgani uchun ikki o‘yinga diskvalifikatsiya qilinadi, deb xabar beradi “Asharq al-Awsat”.
Manbaga ko‘ra, Saudiya futbol federatsiyasi tartib-intizom qo‘mitasi Ronalduni ikki o‘yinga diskvalifikatsiya qilish haqida qaror qabul qildi. Shu bilan birga, qo‘mita portugaliyalikni o‘yindagi voqea yuzasidan so‘roq qilgan va futbolchi nohaq qizil kartochka olganini aytgan.
Eslatib o'tamiz, 86-daqiqada Ronaldu raqibga tirsagi bilan zarba bergani uchun to‘g‘ridan-to‘g‘ri qizil kartochka olgandi. Portugaliyalik futbolchi maydondan chetlatilgach, sardorlik bog‘ichini sherigiga tashlab, orqasiga o‘girilib, hakam tomon istehzoli qarsak chalgan edi.
Joriy mavsumda Ronaldu barcha turnirlarda 37 ta uchrashuvda qatnashib, 36 ta gol va 12 ta golli uzatmani amalga oshirdi.
Izoh (0)