Jizzax viloyati Sharof Rashidov tumanida sifatsiz yog‘ mahsulotlarining muomalaga kiritilishining oldi olindi. Bu haqda Iqtisodiy jinoyatlarga qarshi kurashish departamenti xabar berdi.
Unga ko‘ra, holat Bosh prokuratura huzuridagi departamentning Sharof Rashidov tuman bo‘limi tomonidan IIB xodimlari bilan hamkorlikda o‘tkazilgan tezkor tadbirda aniqlangan. “D.” MCHJ mas’ul shaxslari “To‘qchilik” MFY hududida joylashgan noturar binoda yashirin sex tashkil etib, ushbu sexda iste’molchilarning hayoti va sog‘lig‘i xavfsizligi talablariga javob bermaydigan yog‘ mahsuloti ishlab chiqarayotgani aniqlangan.
40,6 tonna chigit, 1 030 litr qo‘lbola yog‘ va boshqa ishlab chiqarishda foydalanilgan tovar-moddiy boyliklari ashyoviy dalil sifatida olingan.
Mazkur holat yuzasidan Jinoyat kodeksining 186-2-moddasi (chigitdan olinadigan mahsulotni qonunga xilof ravishda ishlab chiqarish yoki muomalaga kiritish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)