Chorva yetkazayotgan zarar, o‘simliklar noqonuniy kesilishi, ortayotgan chang-to‘zonlar — Senat muhofaza etiladigan tabiiy hududlarning holati yuzasidan hukumatga so‘rov yubordi

Oliy Majlis Senati muhofaza etiladigan tabiiy hududlarning sifat tarkibini yaxshilash, o‘simlik va hayvonot dunyosini asrash hamda kadastrini yuritish holati yuzasidan Vazirlar Mahkamasiga parlament so‘rovi yubordi. Bu haqda Sena axborot xizmati “Daryo”ga ma’lum qildi. 

So‘rovda muhofaza etiladigan tabiiy hududlar (METH)ga yetarlicha e’tibor qaratilmayotganiga alohida urg‘u berilgan.

Aholi tomonidan chorva mollarining boqilishi va boshqa salbiy omillar natijasida METHning umumiy biomassasi siyraklashmoqda.

Turli tabiiy va antropogen omillar tufayli hayvonot va o‘simlik olami turlarining soni kamayib, yashash muhitlaridagi shart-sharoit yanada keskinlashmoqda.

Inqirozga uchragan maydonlarni qayta tiklash ishlari amalga oshirilmagani tufayli shamol va suv ta’sirida tuproq eroziyasi kuchayib, cho‘llanish va chang-to‘zonlarning hosil bo‘lishi ortib bormoqda.

Bir nechta METHda o‘rnatilgan tartib-qoidalar (rejim) buzilishi holatlari ro‘y bermoqda. Jumladan, ushbu hududlarda brakonyerlik, noqonuniy qurilishlar hamda aholi tomonidan chorva mollarining boqilishi oqibatida yovvoyi hayvonlar va o‘simliklarga zarar yetkazilmoqda, — deyiladi Senat axborotida.

Yuqoridagi kabi sabab va omillar inobatga olingan holda hukumatga parlament so‘rovi yuborilgan. Unda:

• yo‘naltirilgan mablag‘larning maqsadli sarflanishi;
• brakonyerlik, hayvonot va o‘simlik dunyosi kontrabandasi;
• o‘simlik dunyosi turlarining noqonuniy kesilishi;
• hayvonot dunyosi obyektlarining davlat kadastri;
• hisobga olish va boshqa ma’lumotlarni raqamlashtirish;
• sohani ilmiy-metodik ta’minlash;
• METHda davlat nazoratini kuchaytirish kabi bir nechta masalalar yuzasidan tushuntirish berish so‘ralgan.

Ma’lumot uchun, respublikada muhofaza etiladigan tabiiy hududlar umumiy maydoni 6,321 million gektarga yetkazilib, ular mamlakat hududining 14,08  foizini tashkil etmoqda. 4400 dan ortiq oliy o‘simlik va 15 000 dan ziyod hayvonot turlari aniqlangan.

METHda O‘zbekiston Respublikasi Qizil kitobiga kiritilgan hayvonlar (umurtqali) turlarining 83 foizi va o‘simlik turlarining 89 foizi qamrab olingan.