Xonanda va aktyorning sevgi hikoyasi butun dunyo e’tiborida bo‘ldi. Ular to‘ydan atigi 3 kun oldin ajralishdi va 19 yildan so‘ng to‘satdan munosabatlari tiklangani haqida e’lon qilishdi. To‘y ham tez orada bo‘lib o‘tdi, yaqinda esa yulduz hujjatli film chiqardi — unda Ben Afflek bilan ishqiy munosabatlari tafsilotlarini ochiqchasiga aytib, ko‘plab sirlarni ochib berdi.
Jennifer va Ben 2002-yilda suratga olish maydonchasida tanishgan.
Avvaliga biz juda yaxshi do‘st edik, — deydi Ben Afflek, — u turmushga chiqqan edi, ishqiy munosabatlar haqida xayolimizga ham keltirmasdik. Bu esa bir-birimizni yolg‘onsiz bilish imkonini berdi. Biz bir-birimizda yaxshi taassurot qoldirishga harakat qilmadik.
O‘sha paytda Jennifer sevgisini ijodi orqali izhor qilgan. U “Dear Ben” qo‘shig‘ini aktyorga bag‘ishlaydi, bu “Mening ehtirosim, mening sevgim, do‘stim va qirolim” kabi so‘zlarni o‘z ichiga olgan romantik izhor edi.
2002-yil oxirida Ben unga turmush qurishni taklif qiladi.
Uyga kirgach, hayratda qoldim: butun uy atirgul gulbarglari bilan qoplangandi. Hamma joyda guldastalar bor edi. Men buni kutmagandim, — deb eslaydi Jennifer o‘sha kunni.
Hujjatli filmda er-xotin birinchi marta to‘ydan 3 kun oldin sodir bo‘lgan ajralish sabablari haqida gapiradi. Bunga ularning munosabatlarining oshkor etilishi natijasida yuzaga kelgan haddan tashqari bosim sabab bo‘lgan.
Biz ajralishimiz kerak edi, chunki bundan qanday o‘tishni bilmasdik. Ikkalamiz ham o‘zimizni anglashimiz lozim edi, — deb tan oladi Jennifer.
2002-yildagi “Jenny from the Block” qo‘shig‘i klipida Ben va Jennifer hamma joyda paparatssilar tomonidan kuzatib yuriladigan mashhur juftlik sifatida paydo bo‘lishlari tasodif emas. Bir yil o‘tgach esa ular to‘y qoldirilgani haqida bayonot beradi: “OAVning to‘yimizga haddan tashqari e’tibor qaratayotgani sababli to‘yni kechiktirishga qaror qildik”. 2004-yilda ular munosabatlardagi tanaffusni rasman e’lon qiladi.
Hujjatli film epizodlaridan birida Ben Jenniferdan ayriliq deyarli 20 yil davom etgani uchun uni kechirganmi yoki yo‘qligini so‘raydi. Bu savolga xonanda shunday javob beradi:
Menimcha, sendan anchagacha g‘azablanganman. Ammo bu yurak og‘rig‘i ikkalamizni ham o‘zimizga kelishga va yaxshi inson bo‘lishga majbur qildi. Men seni butunlay kechirdim.
Umrimning oxirigacha u bilan birga bo‘lishni xohlayotganimni bilardim. Lekin bunga erisha olmaymiz deb qo‘rqardim. Haqiqatan ham sevgan insoningdan voz kechish juda qiyin. O‘sha paytda yetarlicha yetuk emas edik, — deydi yulduz.
Bendan rasman ajralgandan atigi 4 oy o‘tgach, Jennifer uzoq yillik sevgilisi, egizaklarining bo‘lajak otasi Mark Entoniga turmushga chiqadi. O‘z xotiralarida u bu ish og‘ir ajralishdan keyin taskin qidirgani uchun sodir bo‘lganini aytadi.
2005-yilda Ben ham aktrisa Jennifer Garnerga uylanadi va bu nikohdan uch nafar farzandi dunyoga keladi.
2021-yil iyul oyida esa Jennifer va Ben Jey Lo ijtimoiy tarmoqdagi sahifalarida birga tushgan suratini joylashtirib, munosabatlarini e’lon qiladi. Bir yil o‘tgach, ularning to‘yi bo‘lib o‘tadi — ular Las-Vegasda, kichik bir cherkovda turmush quradi.
Biz uddaladik. Sevgi go‘zal, sevgi mehribon, sevgi sabrli ekan. Yigirma yillik sabr, — deydi keyinroq Jey Lo.
“Hech qachon aytilmagan buyuk sevgi hikoyasi” deb nomlangan hujjatli filmda xonanda 20 yil oldin ajralishga qaror qilganlarida ham Ben bilan bir-birini sevishdan to‘xtamaganliklarini aytadi.
Ben Afflek esa hech qachon sevgisini omma oldida namoyish qilishni xohlamagan, bu haqda maxsus filmlar yaratishni-ku umuman istamagan. U va Jey Lo yana uchrasha boshlaganlarida aktyor “Men munosabatlarimizni ijtimoiy tarmoqlarda e’lon qilishni xohlamayman”, degandi. To‘g‘ri, keyin u bunday shartlarni qo‘yishga haqqi yo‘qligini va eng yaxshisi murosa qilish ekanini tushundi.
Filmda juda ko‘p ta’sirli lahzalar bor. Misol uchun, Jey Lo eriga uni uyda tartibsiz, sport uslubidagi shim va chiziqli paypoqlarda ko‘rishga odatlanganligini aytgan epizod kabi. Ben esa darhol sevgilisiga javoban: “Sen ajoyibsan va men shunga o‘rganib qolganman”, deydi.
Shuningdek, filmda butunlay boshqa Jenniferni ko‘rish mumkin — mashhur yulduz emas, balki ish bilan bandligi tufayli eri va bolalariga yetarli vaqt ajratolmayotganidan tashvishlanadigan charchagan ayol.
Qizig‘i shundaki, do‘stlari va tanishlari Jey Loni bu loyihadan voz kechishga undagan. Ba’zilar hatto uni ahmoq deb atagan. Misol uchun, taniqli aktrisa Jeyn Fonda dugonasining shaxsiy hayotini ommaga namoyish qilish fikridan qaytarishga harakat qiladi, lekin oxirida u qo‘shiqchini qo‘llab-quvvatlaydi.
Ben Afflek rafiqasi barchaga uning sevgi maktublari yozilgan albomni ko‘rsatganini bilgach, hayratda qoladi. U bu haqda shunday deydi: “Men har doim bunday shaxsiy narsalarni muqaddas deb bilganman”. Axir, bu albomda uning birinchi uchrashuvidan beri saqlangan barcha qog‘oz va elektron yozishmalari ham bor edi.
Jennifer Benning barcha sevgi maktublarini mazmunidan foydalanishlari uchun yangi film ustida ishlayotgan hamkasblariga beradi. “Men buni butun dunyo bilan baham ko‘rmoqchi edim”, deb tushuntiradi qo‘shiqchi va aktrisa eriga yoqmagan bu harakatini.
Aytgancha, ekspertlarning ta’kidlashicha, hatto Benning tana tili ham u hech qachon ommaviy axborot vositalar e’tiborini yoqtirmaganligini ko‘rsatadi. Bundan farqli o‘laroq, Jennifer his-tuyg‘ularini va shaxsiy fikrlarini kamerada osongina ifodalaydi va uni syujetning bir qismiga aylantiradi.
Ben Afflek ularning shaxsiy hayoti ommaning diqqat markazida bo‘lishidan xavotirda edi. Katta ehtimol bilan, aktyor ommaviy axborot vositalari va jamoatchilik e’tibori tufayli yana sevgisini yo‘qotishidan qo‘rqqan.
Ammo xayriyatki, uning qo‘rquvlari asossiz edi. Ben shunday deydi:
Men hech qanday sababsiz tashvishlanardim. Film men haqimda emasdi. Bu o‘zingizni sevish qobiliyati haqida — bunday sevgiga erishish chiroyli shahzodani topishdan ko‘ra qiyinroq.
Jenniferning tan olishicha, eri uning ishi uchun ilhom parisi rolini o‘ynashni yoqtirmaydi, lekin uni yaxshi ko‘radi va musiqa yoki film suratga olishda rafiqasini qo‘llab-quvvatlaydi.
Izoh (0)