Tojikiston va boshqa davlatlarda ommabop bo‘lgan Avesta axborot agentligi O‘zbekiston qishloq xo‘jaligi vaziri akademik Ibrohim Abdurahmonovning o‘zbek-tojik munosabatlari tarixi va bugungi kuniga bag‘ishlangan maqolasini e’lon qildi.
O‘zbekiston barcha qo‘shni davlatlar bilan yaxshi qo‘shnichilik munosabatlarini o‘rnatgan. Xususan, “ikki tilda so‘zlashuvchi bir xalq”, “bir daryoning ikki irmog‘i” sifatida tavsiflangan o‘zbek va tojik xalqlarini umumiy tarix, madaniyat va ma’naviy qadriyatlar, ko‘p asrlik o‘zaro hurmat an’analari birlashtiradi. Bu yaqinlik O‘zbekiston va Tojikiston o‘rtasidagi barcha sohalardagi munosabatlar uchun mustahkam asos bo‘lib xizmat qiladi, — deb yozadi vazir.
Ikki davlat o‘rtasidagi muloqotning xarakteri ko‘p jihatdan prezidentlar o‘rtasida shakllangan o‘zaro ishonchga bog‘liq, deya ta’kidlanadi maqolada. “Bu jihat davlatlar rahbarlari bir-biriga “mening aziz birodarim” deb murojaat qiladigan norasmiy munosabatlarda ham o‘z ifodasini topadi. Oliy darajadagi ochiq, halol muloqotlar hukumatlararo va idoralararo hamkorlikni mustahkamlash uchun mustahkam zamin yaratdi”, — deya ta’kidlaydi vazir.
2018-yilning 1-martidan ikki davlat fuqarolari hayotida chinakam unutilmas baxtli kunlar boshlandi, deb yozadi nashr. “Axir o‘shanda O‘zbekiston va Tojikiston rahbarlari o‘rtasida erishilgan kelishuvlar amalga oshirilishining yorqin misoli sifatida ikki davlat chegarasi orqali o‘tadigan 9 ta nazorat-o‘tkazish punktlarining tantanali ochilish marosimi bo‘lib o‘tdi”, — deya vazirning so‘zlaridan iqtibos keltiradi Avesta axborot agentligi.
Keyingi yillarda ikki davlat chegaralarida 17 ta yuk tashish punkti ochilib, shu munosabat bilan tashkil etilgan bayram tantanalarida qo‘shni tumanlar aholisi ham ishtirok etib, o‘z minnatdorchiligini bildirmoqda.
“Qardosh xalqlarimiz intiqlik bilan kutgan bu haqiqat fuqarolarning harakatlanishini osonlashtirish imkonini berdi. Bu, o‘z navbatida, ikki davlatning do‘st xalqlari o‘rtasidagi oilaviy rishtalarni saqlash va mustahkamlashga xizmat qilmoqda. Bugun har ikki davlat rahbarlari ko‘p tomonlama sheriklik munosabatlarini izchil rivojlantirish va mustahkamlashga, shuningdek, yelkama-yelka turib, yangi marralarni zabt etishga intilishlarini namoyon etmoqdalar”, — deb yozadi qishloq xo‘jaligi vaziri.
Izoh (0)