O‘zbekistonning Erondagi elchisi Fariddin Nasriyev baliqchilik sohasiga ixtisoslashgan Beyza Feed Mill (BFM Group) kompaniyasi boshqaruvi kengashi raisi Amir Abudi bilan uchrashuv o‘tkazdi. Bu haqda “Dunyo” agentligi xabar berdi.
Qayd etilishicha, suhbat davomida Amir Abudi Beyza Feed Mill kompaniyasi faoliyati haqida batafsil axborot bergan. Kompaniyaning Sheroz shahrida joylashgan zavodida baliqlar uchun ozuqa hamda baliqdan tayyor va yarim tayyor mahsulotlar, ikra ishlab chiqariladi.
O‘z navbatida, elchi xorijiy investorlar uchun mamlakatda yaratilayotgan sharoitlar va taqdim etilayotgan imtiyozlar haqida atroflicha maʼlumot taqdim etgan. Shuningdek, u eronlik tadbirkorga O‘zbekistonda baliqchilik xo‘jaligini barpo etish bo‘yicha investitsiyaviy loyihani amalga oshirishni taklif qilgan.
Muloqot natijasiga ko‘ra, Beyza Feed Mill kompaniyasi rahbari Amir Abudi bilan Xorazm viloyatida qiymati 25 million dollarga teng baliqchilik klasterini barpo etish loyihasini amalga oshirish bo‘yicha kelishuvga erishilgan. 14-21-aprel kunlari eronlik investorning Xorazm viloyatiga loyiha borasida batafsil muzokaralar o‘tkazish uchun tashrifi rejalashtirilgan.
Bundan oldin Xitoy kompaniyasi Andijonda quyosh fotoelektr stansiyasini, Janubiy Koreya esa O‘zbekistonda poligonlardan chiqayotgan gazlarni ushlab qoluvchi obyekt qurishi to‘g‘risida xabar berilgandi.
Izoh (0)