AQSH qurolli kuchlari 15-aprel kuni Yaman husiylarining harbiy istehkomlarini bombardimon qildi. Bu haqda Yaqin Sharq manbalariga tayanib, Anadolu nashri xabar berdi.
Husiylar nishonlariga hujum haqida dastlab AQSH Markaziy qo‘mondonligi xabar bergan. G‘arb hujumi husiylarning 13-aprel kuni Adan ko‘rfaziga raketa uchirishiga javoban amalga oshirilgani maʼlum qilingan.
“13-aprel kuni mahalliy vaqt bilan soat 19:00da Eron tomonidan qo‘llab-quvvatlangan husiy terrorchilar Yamandagi o‘zlari nazorat qilayotgan hududdan Adan ko‘rfazi tomon kemaga qarshi ballistik raketalar (ASBM) uchirdilar. Koalitsiya qo‘shinlari bunga javob qaytardi”, — deyiladi qo‘mondonlik xabarida.
AQSH rasmiylari maʼlum qilishicha, qurolli kuchlar maxsus operatsiya davomida husiylarga tegishli dronlarni urib tushirgan. Raqibning muhim strategik nuqtalariga hujumlar muvaffaqiyatli amalga oshirilgan.
Yaman husiylari guruhi 7-oktabrdan beri Isroil hujumi ostida bo‘lgan G‘azo sektori bilan birdamlik ko‘rsatish uchun Qizil dengizda isroillik kompaniyalarga tegishli bo‘lgan yuk kemalariga hujumlar uyushtirib kelmoqda. Neft va yoqilg‘i tashish uchun dunyoda eng ko‘p foydalaniladigan Qizil dengiz yo‘li husiylar tomonidan to‘sib qo‘yilgan.
AQSH mudofaa vaziri Lloyd Ostin husiylar hujumlariga qarshi turish uchun ko‘p millatli missiya tashkil etilishini eʼlon qilgan.
Izoh (0)