O‘zbekiston Bojxona qo‘mitasining Rossiyadagi vakili o‘z faoliyatini boshladi. Bu haqda qo‘mita matbuot xizmati xabar berdi.
2022-yilning 2-dekabrida Samarqand shahrida bo‘lib o‘tgan O‘zbekiston va Rossiya hukumat rahbarlari darajasidagi qo‘shma komissiyaning 3-majlisi doirasida ikki mamlakat bojxona xizmati rahbarlari O‘zbekiston va Rossiyada bojxona xizmatlari vakolatxonalarini ochish to‘g‘risida bitim imzolagan.
Qayd etilishicha, mazkur bitim amalga oshib, O‘zbekistonning Rossiyadagi favqulodda va muxtor elchisi Botirjon Asadov, Bojxona qo‘mitasining Rossiyadagi vakili etib tayinlangan Zafar Sanginov va Rossiya federal bojxona xizmati rahbari Ruslan Davidov ishtirokida uchrashuv bo‘lib o‘tgan.
Uchrashuv davomida tomonlar savdo-iqtisodiy hamkorlikning keng ko‘lamli masalalarini muhokama qilgan. Tahlillarga ko‘ra, 2016-yildan boshlab O‘zbekiston va Rossiya o‘rtasidagi tovar ayirboshlash hajmi yiliga 15-20 foizga o‘sib bormoqda.
O‘zbekiston Bojxona qo‘mitasi vakilining Rossiyada ish boshlashi bojxona xizmatlari o‘rtasidagi hamkorlikni muvofiqlashtirish va faollashtirishga xizmat qiladi. O‘zbekiston bilan Rossiya o‘rtasida tovarlar va transport vositalarining erkin o‘tishiga to‘sqinlik qiladigan sabablarni baholash, aniqlash va joyida bartaraf etish imkonini beradi, — deyiladi xabarda.
Eslatib o‘tamiz, yanvar o‘rtalarida “O‘zbekiston Respublikasi davlat bojxona xizmati organlarining shaxsiy tarkibi hamda ularning oila aʼzolarini ijtimoiy himoya qilish tizimini tartibga solish to‘g‘risida”gi Vazirlar Mahkamasi qarori qabul qilingandi.
Izoh (0)