Aytishlaricha, mashhur model Ayshvariya Ray “Hindiston go‘zali” go‘zallik tanloviga ariza topshirganida, 20 nafar qiz shu zahotiyoq bunday sohibjamol bor joyda ularga hech qanday imkoniyat qolmasligini bilib, tanlovda ishtirok etishdan bosh tortgan. Bugungi kunda Ayshvariya nafaqat hind, balki G‘arb kinosi yulduzi, shuningdek, tanlov tarixidagi “Eng muvaffaqiyatli dunyo go‘zali” unvoniga ham ega.
Ray shou-biznesga kirishini tasavvur qilish qiyin edi, chunki uning oilasi Bollivud olamidan juda uzoqda bo‘lgan.
Ayshvariya Ray 1973-yil 1-noyabrda Hindiston armiyasi biologi Krishnaraj Ray va uy bekasi Vrinda oilasida tug‘ilgan. Hind me’yorlari bo‘yicha bu oila kichik hisoblangan — ikkita bola: o‘g‘li Aditya, u hozirda dengiz flotida ofitser bo‘lib ishlaydi va qizi Ayshvariya.
Ray sulolasining ildizlari Janubiy Hindistonga, Karnataka shtatining Mangalor shahriga borib taqaladi. Ayshvariya bolaligidan uch tilda gapira olgan: u ingliz, hind va ona tili tulu tillarini yaxshi biladi. Tug‘ilishidan ko‘p o‘tmay, 1970-yillarning o‘rtalarida o‘sha paytda savdo dengiz floti ofitseri bo‘lgan otasining ishi Mumbayga ko‘chiriladi.
Do‘stlari va qarindoshlarining so‘zlariga ko‘ra, Aysh har doim a’lochi bo‘lgan va raqsga tushishni yaxshi ko‘rardi. Aktrisa o‘zining dastlabki intervyularida shunday deydi:
Men sinfda har doim birinchi bo‘lganman. Faqat bir marta, 7-sinfda o‘qiyotganimda imtihonlarda uchinchi bo‘lganman. Bu menga qanchalik zarba berganini eslayman. Eng zo‘ri bo‘lish va boshqalarni mag‘lub etish men uchun qanchalik muhimligini o‘shanda anglagandim. Shundan keyin kunlab uxlamaganman, tun bo‘yi topshiriqlarni o‘rganib, oxirgi semestrda yana barcha fanlardan birinchi bo‘lganman.
Aytishlaricha, uning go‘zalligi haqidagi gap-so‘zlar har yonga tarqaladi. Keyinchalik Ayshvariyaning sinfdoshlari va o‘qituvchilari ko‘k ko‘zli sohibjamol qizni ko‘rish uchun kollej darvozasi oldida turnaqator navbatlar paydo bo‘lganini eslashadi.
Kollejda o‘qituvchisi yosh Ayshvariyaga portfolio qilishni maslahat beradi. Bu ijtimoiy tarmoqlardan ancha oldingi gap edi, lekin uning suratlari internetda tezda tarqalib ketadi. Fotosuratchilar Gautam Rajadhyaksha va Farrox Chotia uni o‘quvchi qizdan yuzlab mahsulotlarni reklama qiladigan modelga aylantiradi.
Sari, tush, soat yoki sovun bo‘ladimi, Rayning yuzi butun Hindistondagi plakatlarni bezaydi. 1993-yilda esa Bollivud aktyori Amir Xon ishtirokidagi Pepsi reklama roligi chiqadi va qizning karyerasini o‘zgartirib yuboradi.
Mumbaydagi mashhurlik davom etayotgan bir vaqtda, Ayshvariya janubga sayohat qiladi va u yerda malayalam va tulu tillaridagi reklamalarda suratga tushadi. Ayshvariyaning do‘stlari unga “Hindiston go‘zali” tanlovida qatnashishni maslahat berishadi. Avvaliga u buni istamaydi, lekin oxir-oqibat rozi bo‘ladi. Mazkur tanlovda g‘olib bo‘lishdan yoki filmlarda rol o‘ynashdan ancha oldin “dunyodagi eng go‘zal qiz” nomini olib bo‘lgan Ayshvariyaning ishtirok etayotganini bilgan 20 nafar qiz tanlovda ishtirok etishdan bosh tortadi.
Ray chindan ham musobaqada peshqadamlik qiladi, ammo so‘nggi turda “Koinot go‘zali” unvonini qo‘lga kiritgan Sushmita Senga yutqazadi.
Ayshvariya ikkinchi o‘rinni egallaydi, lekin u darhol “Dunyo go‘zali” tanloviga hujjat topshiradi va maksimal ball bilan tojni qo‘lga kiritadi. 20 yildan so‘ng esa tashkilotchilarning fikri asosida shakllantirilgan tanlov tarixidagi “Eng muvaffaqiyatli dunyo go‘zali” unvoniga sazovor bo‘ladi.
G‘alaba qozonib, Hindistonga qaytgandan so‘ng qiz uchun keyingi qadam Bollivud bo‘ladi. Ammo buning o‘rniga Ayshvariya tamil kino sanoatini tanlaydi va 1997-yilda tanqidchilar tomonidan e’tirof etilgan “Duet” filmida Mani Ratnam bilan debyut qiladi. Iste’dodli aktrisa tez orada Bollivud, o‘n yildan keyin esa Gollivud ekranlarida paydo bo‘ladi.
Bollivuddagi debyutidan roppa-rosa o‘n yil o‘tgach, 2007-yil aprel oyida u hamkasbi Abxishek Bachchan — hind kinosi yulduzlari Jaya va Amitabh Bachchanning o‘g‘liga turmushga chiqadi.
Ona bo‘lganidan so‘ng Aysh katta ekranda kamroq ko‘rina boshlaydi. U oxirgi marta Mani Ratnamning “Kaverining o‘g‘li” loyihasida suratga tushgan. Ikki qismli epik drama tanqidchilar tomonidan juda ko‘p ijobiy baholarga sazovor bo‘ladi va tamil kinosi tarixidagi eng yuqori daromad keltiruvchi filmlardan biriga aylanadi.
Izoh (0)