Ijtimoiy himoya milliy agentligi reyestridagi o‘zgalar parvarishiga muhtoj shaxslarga uyda ijtimoiy-maishiy xizmatlarni ko‘rsatish uchun xususiy sektor ishtirokchilari hamkorlikka chaqiriladi.
Qayd etilishicha, Toshkent shahrining Mirzo Ulug‘bek tumanidagi o‘zgalar parvarishiga muhtoj shaxslarga uyda ijtimoiy-maishiy xizmatlar ko‘rsatishni autsorsing orqali tashkil etish bo‘yicha pilot loyihasi amalga oshiriladi. Loyihani amalga oshirishda agentlik tomonidan xodimlarni bepul o‘qitish, xizmatni monitoring qilish uchun axborot tizimidan bepul foydalanish va ijtimoiy xizmatlarni keng yoritish xizmatlari taklif etiladi.
Uyda ijtimoiy-maishiy xizmatlar quyidagilarni o‘z ichiga oladi:
- ovqat tayyorlash (mijozni yoshi, tabiati va allergik xususiyatlarini inobatga olgan holda) va yarim tayyor mahsulotlarni tayyorlab muzlatkichda saqlab qo‘yish;
- supurish-yig‘ishtirish (xonadondagi mijoz foydalanishi zarur bo‘lgan barcha xonalarni va jihozlarni tozalash);
- kiyim-kechaklarni yuvish;
- gigiyena tadbirlarini amalga oshirish;
- zarur oziq-ovqat mahsulotlari va dori-darmonlarni uyga yetkazib berish;
- xonadondagi santexnika jihozlarini taʼmirlashda (uy-joyni boshqaruvchi tashkilotlar va boshqaruvchilarni jalb qilish) ko‘maklashish;
- sartaroshlik xizmatidan foydalanishda ko‘maklashish;
- qarindosh va do‘stlar bilan yozishmalarda ko‘maklashish;
- tibbiyot va sport muassasalariga borish va kelishda hamrohlik qilish.
Ishtirokchilarga qo‘yiladigan talablar:
- Tibbiy xizmat yoki uyda maishiy xizmat ko‘rsatish tajribasiga ega tadbirkorlik subyektlari ishtirok etishi maqsadga muvofiq.
Ushbu xizmatni ko‘rsatuvchi yoki ko‘rsatishga imkoniyati bor tadbirkorlar 2024-yil 20-aprelga qadar +998 (88) 199-25-52 raqami orqali aloqaga chiqishlari so‘raladi. Loyiha bo‘yicha qo‘shimcha maʼlumotlar bilan quyidagi havola orqali tanishishi mumkin.
Prezident huzurida Ijtimoiy himoya milliy agentligi davlat rahbarining 2023-yil 1-iyundagi farmoni bilan tashkil etilgandi. Uning Qoraqalpog‘iston Respublikasi, viloyatlar va Toshkent shahar boshqarmalari hamda tuman (shahar)larda “Inson” ijtimoiy xizmatlar markazlari ham tashkil etildi.
Izoh (0)