Ayni paytda Shavkat Mirziyoyev raisligida o‘tayotgan yig‘ilishda Jizzax viloyatini ijtimoiy-iqtisodiy rivojlantirish masalalari muhokama qilinmoqda. Prezident o‘rganishlar natijasida Jizzaxning 13 ta tumanida iqtisodiy turtki beradigan yangi imkoniyat va zaxiralar aniqlanganini taʼkidladi.
Davlat rahbari ushbu imkoniyatlarni Zarbdor tumani misolida tushuntirib, ularni ishga solish uchun 130 milliard so‘m ajratishga topshiriq berdi.
Masalan, tumanda tadbirkorlar ko‘targan muammolarni hal qilish orqali 5 mingta ish o‘rni yaratish mumkin. “Zarbdor parranda” korxonasining 12 ta mahalladagi 1 mingta xonadonga 1 million bosh jo‘ja tarqatib, aholini band qilish loyihasi shular jumlasidan.
Zarbdor tumanidagi “DM-1” kanalidan suv ichadigan Istiqbol, Nurafshon, Namuna, G‘alaba mahallalarida suv tejovchi texnologiyalar joriy qilinsa, dehqonlarning 1 ming gektar yerida, shuningdek, tuman yoshlariga bo‘lib berilgan 3 ming gektarda qovun yetishtirish va uni qayta ishlash orqali 28 million dollar eksport qilish mumkin.
Zarbdorni 12 ming gektar yerlari “DM-3” kanalidan eng samarali bo‘lgan o‘zi oqar yopiq quvur usulida suv olishga mo‘ljallangan. Lekin uning 160 kilometri yaroqsiz holga kelgan. Mutasaddilarga kanalni taʼmirlash loyihasini kelgusi yil investitsiya dasturiga kiritish topshirildi. Shunday sug‘orish tarmog‘ini Zomin tumaniga ham tortib borish muhimligi qayd etildi.
Zarbdordagi “Zarbdor tekstil” korxonasida 800 kishi ishlaydi. Turkiyalik investor bu yerda yana 1 ming o‘rinli quvvatni ishga tushirish va eksportni 50 million dollardan oshirishni mo‘ljallagan. Davlat rahbari bunday minglab ish o‘rinlari yaratadigan, eksport qiladigan korxonalarni qo‘llab-quvvatlashga tayyorligini aytdi.
Mutasaddilarga eksport hajmi 50 million dollardan oshgan korxonalarga aylanma uchun 10 million dollargacha resurs ajratishni yo‘lga qo‘yish bo‘yicha ko‘rsatma berildi.
Izoh (0)