Irjar —Do‘stlik—Jizzax yo‘nalishida teplovoz qatnovi yo‘lga qo‘yiladi

Shavkat Mirziyoyev raisligida o‘tayotgan yig‘ilishda Jizzaxda yangi yo‘nalishda teplovoz qatnovi yo‘lga qo‘yilishi ma’lum qilindi.

Sentyabrdan boshlab Irjar—Do‘stlik—Jizzax yo‘nalishida teplovoz qatnovi yo‘lga qo‘yiladi. Ushbu yo‘nalish Sharof Rashidov, Paxtakor, Do‘stlik va Mirzacho‘l tumanlarini Jizzax shahri bilan bog‘laydi.

Qayd etilishicha, buning natijasida ushbu tumanlardagi 450 ming aholini shaharga qatnashida yengillik yaratiladi.

Prezident matbuot kotibining ma’lum qilishicha, davlat rahbari viloyatdagi mahallalar infratuzilmasini yaxshilash, joylarda bog‘cha va maktablar qurish, Jizzax shahridagi tibbiyot muassasalari va ko‘priklarni ta’mirlash chora-tadbirlari yuzasidan mutasaddilarga aniq topshiriqlar berdi.

Umuman, Jizzaxda mahalla infratuzilmasini yaxshilash, biznesni qo‘llab-quvvatlash, grantlar ajratish uchun qo‘shimcha 300 milliard so‘m ajratilishi belgilandi.