DXX xodimlari tomonidan Qashqadaryo va Sirdaryo viloyatlarida sifati kafolatlanmagan hamda tegishli hujjatlari bo‘lmagan dori vositalarining savdosiga chek qo‘yildi.
Qayd etilishicha, Yakkabog‘ tumanida yashovchi 28 yoshli shaxs “Banksef”, “Zanasef”, “Gansef” va “Gandsef” nomli jami 3 ming 767 dona dori vositalarini 54 million so‘mga sotgan vaqtida ashyoviy dalillar bilan ushlangan. U dori vositalarini mazkur tumanda yashovchi fuqarodan olgani aniqlanib, ushbu shaxs ham muqaddam sotgan dorilari uchun 26 million so‘m olgan vaqtida ushlangan.
Shuningdek, uning xonadoni tegishli hujjatlari bo‘lmagan, umumiy bahosi 1 milliard 307 million so‘mlik jami 14 ming 909 dona dori vositalari borligi aniqlanib, protsessual tartibda rasmiylashtirib olingan. Ma’lum bo'lishicha, ushbu dori vositalari – tibbiyotda qo‘llanilishiga ruxsat etilgan dori vositalari, tibbiy buyumlar va tibbiy texnikalar davlat ro‘yxatidan o‘tmagan.
Sirdaryo viloyati Xovos tumanida yashovchi fuqaroning xonadoni ko‘zdan kechirilganda, uning xonadonidan Xitoy davlatida ishlab chiqarilgan, tegishli hujjatlari bo‘lmagan va sifati kafolatlanmagan, umumiy qiymati 593 million 142 ming so‘mlik 49.020 dona flakonda “Ampisul” nomli dori vositalari borligi aniqlangan hamda ularning egasi hisoblangan Bekobod shahrida yashovchi 34 yoshli shaxs qo‘lga olingan.
Shuningdek, tergovga qadar tekshiruv davomida, ushbu dori vositalarini Farg‘ona viloyatida yashovchi, 1990 va 1994-yillarda tug‘ilgan ikki nafar fuqaro Tojikistondan bojxona nazoratini chetlab o‘tib, olib kelgani aniqlanib, ular ham ushlangan.
Hozirda har ikki holat yuzasidan mazkur shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Avvalroq Farg‘onada 17 yoshli bola yashayotgan uydan 30 kilodan ortiq narkotik moddalar topilgani to‘g‘risida xabar berilgandi. Shuningdek, Samarqandda fuqaroning uyidan salkam 32 kilo marixuana topilgan edi.
Izoh (0)