Qozog‘istonda 21 yoshli ona ovqat so‘ragan qizlarini bo‘g‘ib o‘ldirdi

Qozog‘istonning Qarag‘anda viloyatida 21 yoshli ayol ovqat so‘ragan ikki qizini bo‘g‘ib o‘ldirdi. Bu haqda Tengrinews xabar berdi.

Ma’lum qilinishicha, ikki yoshli Mia va to‘rt yoshli Karina ochlikdan qiynalgan. Ular yana bir bor onalaridan ovqat so‘raganida ayol ularni bo‘g‘ib o‘ldirgan. Ona uchinchi farzandi — olti oylik qiziga zarar yetkazmagan.

U 4-aprel kuni tushlik vaqtida bolalarini bo‘g‘ib o‘ldirgan. Kechgacha xonadoshini jasadlar bilan birga kutib o‘tirgan. Erkak ishdan kelganida ayol karavotda yotgan jasadlarni ko‘rsatib, ular sababsiz vafot etganini aytgan. Erkak politsiyaga qo‘ng‘iroq qilgan. Keyin ayol politsiyani ham chalkashtirib, bolalar noma’lum moddadan zaharlangan, degan versiyani ilgari surgan. Politsiya bolalar oxirgi safar nima yeganini ko‘rish uchun darhol oshxonaga kirgan. U yerda esa zarracha ovqat ham bo‘lmagan, — deyiladi xabarda.

Qo‘shnining so‘zlariga ko‘ra, agar ular oila ochlikdan azob chekayotganini bilishganida, “butun qishloq bo‘lib ularni boqishardi”.

Xonani ko‘zdan kechirdim, bolalar uxlayotgan ekan va yotoqxonadan chiqib ketdim, — degan ayol politsiyaga.

U yolg‘on gapirdi. Men ham oxirgi lahzagacha ular zaharlangan yoki biror narsa yegan bo‘lishi mumkin, deb o‘ylagandim, — deydi ayolning xonadoshi Aleksandr.

Ta’kidlanishicha, bu oilada nafaqat bolalar, balki uy mushugi ham och qolgan.

Hayvon juda ozib ketgan va deyarli ovqatlanmagan. Mushukning ahvoli u juda uzoq vaqt davomida oziqlanmaganini ko‘rsatadi. Bundan tashqari, u uy muhrlanganidan buyon ko‘chada yashamoqda, — deyiladi xabarda.