Qirg‘iziston poytaxti Bishkekda 2024—2030-yillarga mo‘ljallangan yo‘l-transport infratuzilmasini rivojlantirish va transport tirbandligini kamaytirish konsepsiyasi tasdiqlandi. Bu haqda munitsipalitet matbuot xizmatiga tayanib, “Ekonomist.kg” xabar berdi.
Konsepsiya shahar hokimligining “Bishkek shahri hududida avtomobil transporti infratuzilmasini rivojlantirish va avtotransport tirbandligini kamaytirish konsepsiyasini tasdiqlash to‘g‘risida”gi qarori shaklida tasdiqlangan. Ushbu konsepsiyani amalga oshirish doirasida Bishkek shahrida yirik loyihalarni amalga oshirish rejalashtirilgan, xususan:
- yo‘l va ko‘prik qurilishi;
- yo‘l infratuzilmasini modernizatsiya qilish;
- avtomobil yo‘llarida velosiped yo‘laklarini tashkil etish;
- to‘xtash joyini tartibga solish va boshqa chora-tadbirlar.
Hokimlik maʼlumotlariga ko‘ra, asosiy vazifa tirbandlikni kamaytirish va yo‘l harakati xavfsizligini taʼminlashdan iborat tizimni joriy etishdan iborat. Shuningdek, Bishkek shahrida yer usti jamoat transportining asosiy shaharlararo va viloyatlararo yo‘nalishlari kesishgan hududda kamida ikkita qulay va zamonaviy transport ayirboshlash uzellarini tashkil etish rejalashtirilgan.
2024—2030-yillarga mo‘ljallangan konsepsiyani amalga oshirish natijasida shahar markazida harakatlanuvchi yengil avtomobillar sonini 20 foizgacha qisqartirish, tirbandlikni 30 foizga kamaytirish, avtobuslarning muntazam qatnoviga erishish va harakat intervallarini 80 foizgacha qisqartirish, shahar aholisining jamoat transportidan foydalanish darajasini 60-70 foizga yetkazish hamda jamoat transportining atrof-muhitga salbiy ta’sirini 50 foizga kamaytirishga erishish ko‘zda tutilgan.
Izoh (0)