O‘zbekistonliklarning 2023-yildagi ekologik huquqbuzarligi uchun 32 milliard so‘mlik jarima tayinlangani ma’lum bo‘ldi

O‘zbekiston aholisi 2023-yilda 40 mingga yaqin ekologik huquqbuzarlik sodir etgan bo‘lib, buning uchun 32 milliard 700 million so‘mlik jarima tayinlangan. Bu haqda Ekologiya vazirligi huzuridagi Ekologik ekspertiza markazi direktori o‘rinbosari Adham Qurbonov ma’lum qildi. 

Bugun, 2-aprel kuni AOKAda Ekologiya vazirligi huzuridagi Ekologik ekspertiza markazi mas’ullari va OAV vakillari ishtirokida matbuot anjumani tashkil etildi. 

Unda so‘z olgan markaz direktori G‘ayratjon Muhammedov sohada amalga oshirilayotgan ishlar haqida gapirgan bo‘lsa, uning o‘rinbosari Adham Qurbonov o‘tgan yili o‘zbekistonliklar tomonidan sodir etilgan ekologik huquqbuzarliklar soniga aniqlik kiritdi. 

2023-yilda 40 mingga yaqin ekologik huquqbuzarliklar holati aniqlanib, ularga nisbatan 32,7 milliard so‘mlik jarima va 13 milliard so‘mlik tabiatga yetkazilgan zararni undirish ishlari olib borildi, — deydi Adham Qurbonov.

Mas’ulning bildirishicha, o‘tgan yili mutaxassislar tomonidan 86 mingga yaqin profilaktik tadbirlar o‘tkazilgan. 

Tadbirlar davomida 23 mingdan ortiq tadbirkorlik va xo‘jalik yurituvchi subyektlarida xatlovlar o‘tkazildi. Unda 450 ta subyektga berilgan ekologik vositalarning muddati o‘tgani sababli 3 milliardga yaqin qo‘shimcha kompensatsiya to‘lovlari hisoblandi. 179 ta korxona faoliyatini to‘xtatish bo‘yicha da’volar qo‘zg‘atilib, ayni kungacha 39 tasining faoliyati to‘xtatildi. 16883 ta mahalliy ahamiyatga ega bo‘lgan va turli toifadagi obyektlar ekologik ekspertizaga muvofiqlashtirildi, — deydi mas’ul.