Samarqand, Surxondaryo va Qashqadaryo viloyatlarining 21 ta tumanida qishloqlar infratuzilmasi yaxshilanadi. Bu haqda Islom taraqqiyot banki ishtirokida “Qishloq joylarni kompleks rivojlantirish” (2-bosqich) loyihasini amalga oshirish chora-tadbirlari to‘g‘risidagi prezident qarorida belgilandi.
Hujjatga ko‘ra, O‘zbekiston hukumati Islom taraqqiyot bankidan 20 yil muddatga 260 million dollarlik imtiyozli qarz jalb qilmoqda. Qarz mablag‘lari hisobidan 2024—2028-yillarda Samarqand, Surxondaryo va Qashqadaryo viloyatlarining 21 ta tumanida qishloqlar infratuzilmasi yaxshilanadi.
Jumladan, loyiha doirasida 20 maktab (19 tasi Samarqandda), 14 bog‘cha, 10 ta oilaviy shifokor punkti (barchasi Samarqandda) quriladi, 200 km ichimlik suvi, 368 kilometr elektr tarmog‘i tortiladi, 53 ta transformator o‘rnatiladi. Qariyb 330 kilometr yo‘l infratuzilmasi yaxshilanib, buning uchun 717 milliard so‘m sarflanadi.
Loyihaning umumiy qiymati 293,5 million dollarga teng bo‘lib, shundan O‘zbekiston ulushi 33,5 million dollarni tashkil etadi.
Izoh (0)