Bugun Toshkent shahrida Ekologiya vazirligi tashabbusi bilan ilgari surilgan “Avtomobilsiz kun” tadbiri bo‘lib o‘tmoqda. Mazkur tadbir doirasida ko‘pchilik amaldorlar xodimlariga namuna ko‘rsatish maqsadida jamoat transportidan, shuningdek, velosipedlardan foydalanib, ishga keldi. “Daryo” avtomobilsiz kun aksiyasida faollik ko‘rsatayotgan amaldorlarning surati hamda videolarini jamladi.
Dastlab tarmoqlarda Transport vaziri Ilhom Mahkamovning yayov yurgani ko‘ringan suratlar tarqalgan bo‘lsa, ko‘p o‘tmay Chilonzor tumani hokimi Saidqahhor Xolxo‘jayev metroda ko‘rinish berdi.
Transport vazirligi axborot xizmati rahbari Navro‘z Ashirmatovning “Daryo”ga bildirishicha, Ilhom Mahkamov bugun aksiyada faol ishtirok etib, ishga jamoat transportida kelgan.
Qo‘shimcha qilinishicha, bugun nafaqat vazir, uning birinchi o‘rinbosari Mamanbiy Omarov hamda o‘rinbosarlari — Jasurbek Choriyev va Ilhomjon Abdug‘affarovlar ham ishga borish uchun avtobusni ma’qul ko‘rgan.
“Avtomobilsiz kun” loyihasida faollik ko‘rsatish uchun metroda yurishni ixtiyor etgan Chilonzor tumani hokimi Saidqahhor Xolxo‘jayev hokimlikning barcha xodimlariga o‘rnak bo‘lgan shekilli, kuzatuvlarimizga ko‘ra poytaxt tumanlaridan faqatgina Chilonzor tumani hokimligi mas’ullari, xodimlari bugun jamoat transportida, shuningdek, piyoda yurib, ishga kelgan. Hokimlik axborot xizmati foto va videolar tarqatar ekan unda tuman hokimi, hokim o‘rinbosarlari aks etganini urg‘ulaydi. Shuningdek, hokimlikning barcha xodimlari va tumandagi tashkilot rahbarlari ham aksiyada faol ekanini ma’lum qilgan.
Sport vaziri Adham Ikromovning svetoforsiz piyodalar yo‘lakchasida avtomobillarning yo‘l berishini kutib turgani ko‘ringan video tarqalgach, uning ishga qanday yetib olgani bilan qiziqdik.
Vazirlik axborot xizmatida faoliyat yurituvchi Behruz ismli mas’ulning “Daryo”ga bildirishicha, Adham Ikromov bugun 93-avtobus xizmatidan foydalanib, ishga yetib olgan.
Raqamli texnologiyalar vazirining matbuot kotibi Sherzod Ahmatovning “Daryo”ga ma’lumot berishicha, vazir Sherzod Shermatov uyidan ishxonagacha bo‘lgan masofani bir soatda yayov bosib o‘tgan.
Bojxona qo‘mitasi raisi Akmalxo‘ja Mavlonov ham tadbirda faol mansabdorlardan biri bo‘ldi. U ishga velosipedda yetib oldi.
“Avtomobilsiz kun” tashabbuskori bo‘lgan Ekologiya vaziri Aziz Abduhakimov davlat rahbari raisligidagi videoselektorga xizmat avtomobilida borgan.
Vazirlik axborot xizmati rahbari Lola Rahmanboyeva vazirning bugun, soat 12:00 gacha “Avtomobilsiz kun” ishtirokchisi bo‘lmaganiga izoh berishicha, prezident selektori juda vaqtli boshlangani bois, vazirning jamoat aksiyasi ishtirokchisi bo‘lishi selektordan keyinga rejalashtirilgan.
Ayni paytda vazirning selektordan chiqishini kutib turibmiz. Ko‘plab OAV vakillari hamrohligida vazir metroda ishga ketishi va yo‘lda barcha jurnalistlarni qiziqtirgan savollarga javob berishi rejalashtirilgan. Tahririyatga foto va videolar taqdim qilamiz, — deydi “Daryo” jurnalisti bilan telefon orqali muloqot qilgan mas’ul.
Toshkentda “Avtomobilsiz kun” aksiyasi davom etmoqda. “Daryo” jarayonni kuzatishda davom etadi.
Izoh (0)