Ijodkorlar endilikda mualliflik haqini oyma-oy qabul qilib olishi mumkin bo‘ladi. Bu haqda “Daryo”ga O‘zbekiston mualliflik va turdosh huquqlarni himoya qilish jamiyati boshqaruv raisi Bobur Ruziyev ma’lum qildi.
Bugungi kunda O‘zbekistonda mualliflik huquqi va turdosh huquqlar muhofazasini ta’minlash, muallif va huquq egalarining gonorarlarining adolatli taqsimlanishiga erishish, ularning buzilgan huquq va qonuniy manfaatlarini himoyasini ta’minlashga erishish muhim ahamiyat kasb etib kelmoqda.
Bu jarayonda mulkiy huquqlarni jamoaviy asosda boshqaruvchi tashkilotlarning tutgan o‘rni alohida ahamiyatga ega. Zero, raqamli texnologiyalar kun sayin rivojlanib borayotgan bugungi bir davrda mualliflik haqlarini samarali yig‘ish va taqsimlashga erishish o‘ziga yarasha qiyin va izlanish talab etadigan ish hisoblanadi.
Bunda esa zamonaviy axborot dasturlaridan foydalanish muhim sanaladi. Ayni ushbu maqsadda O‘zbekiston mualliflik va turdosh huquqlarni himoya qilish jamiyati — “UzAvtor” NCM dasturiy ta’minotini ishlab chiqdi va uni ishga tushirdi. Mazkur tizim orqali restoran, kafe, bar, televideniye, radiolardan hamda raqamli provayder va boshqa foydalanuvchilardan yig‘ilgan mualliflik haqini taqsimlab borish mo‘ljallangan.
Shuningdek, O‘zbekistonda birinchi marotaba YouTube video-hostingidan ham shoir va bastakorlarga mualliflik haqi to‘lab berildi va endilikda doimiy ravishda to‘lab borilishi ta’minlanishi rejalashtirilgan.
Izoh (0)