Germaniyalik mashhur dizayner Karl Otto Lagerfeldning Parijdagi hashamatli kvartirasi kimoshdi savdosida 11 million dollarga sotildi. Bu haqda “Pravila jizni” nashri xabar bermoqda.
WWD nashri qayd etishicha, marhum dizayner 2006-yildan to 2019-yilgacha — to umrining so‘nggi kunlariga qadar mazkur uyda yashab kelgan.
Uy sotilgani haqida bitim imzolangani haqidagi xabarni savdoda ishtirok etgan notarius yordamchisi Tomas Jusselin tasdiqladi. Xaridorning ismi oshkor qilinmagan. Lagerfeldning futuristik uslubdagi 260 kvadrat metr maydonga ega mazkur kvartirasi dastlab 5,7 million dollarga baholangan edi.
Xonadon minimalizm usulidagi dizaynga ega: yorqin rangdagi devorlar, ko‘plab chiroqlar va aylanadigan shisha kitob javonlari mavjud. Uy ilgari Lagerfeldning kitoblari va noyob mebellari bilan to‘la bo‘lgan. Xonadon derazasi Sena va Luvr muzeyiga qaragan.
Lagerfeld ushbu kvartirani 2004-yilda sotib olgan. Bundan tashqari, uning Parijda, Sankt-Tropezda va Monakoda bir qancha boshqa ko‘chmas mulklari mavjud.
Karl Lagerfeld 2019-yil 19-fevralda 85 yoshida vafot etdi. U ko‘plab moda brendlari bilan ishlagan va yetakchi nashriyotlar bilan fotograf sifatida hamkorlik qilgan. 1984-yilda u Chanel va Fendi brendlari kreativ direktori bo‘lgan va keyinchalik o‘zining Karl Lagerfeld brendini ishga tushirgan.
Dizayner vafotidan so‘ng Sotheby’s auksion uyi Lagerfeldning shaxsiy buyumlari — mebel, interyer buyumlari va boshqa premdetlarini kimoshdi savdosiga qo‘ydi.
Izoh (0)