O‘zbekistonda xizmat ko‘rsatgan artist Yulduz Turdiyeva “Milliy” telekanalining “Shou biz news” ko‘rsatuviga bergan intervyusida muxlislarini qiziqtirgan ko‘plab savollarga javob berdi.
— Chaqaloq parvarishida qiynalmayapsizmi?
— Qizim — 10 yil kutilgan farzandimiz. Qiz farzandni juda ham orziqib kutganmiz. Albatta unga qarashga yaqinlarim yordam bergani uchun qiynalmayapman. Shuning sabab 1-martdan boshlab ijod va xizmatlarga qaytdim.
— Qizingizga aynan Mehribon deb ism qo‘yishingizga sabab nima?
— Turmush o‘rtog‘im doim menga “Yulduz, qizimiz bo‘lsa ismini Mehribon deb qo‘yaylik”, derdilar. Men esa Mehrimoh qo‘yishni xohlagandim. Lekin turmush o‘rtog‘im astoydil niyat qilgan ekanlar, Mehribon ismini tanladik.
— Ovozingiz o‘zingizga yoqadimi?
— Ovozim o‘zimga yoqmaydi. Qo‘shiqlarimni eshita olmayman. Gapirganimda ovozim yoqadi, lekin kuylaganimda eshita olmayman. Uyda ham farzandlarim mening qo‘shig‘imni qo‘yishsa, boshqa xonaga chiqib ketaman.
— Repertuaringizdagi o‘zingizga yoqmaydigan qo‘shig‘ingiz qaysi?
—“Fikr-u xayolim sendadir” degan qo‘shiqni kuylaganimdan afsuslanaman. Unga klip ham suratga olganmiz buning ustiga.
— Eng qimmatga tushgan qo‘shig‘ingiz qaysi?
— Meni ommaga tanitgan “Ona, men keldim degin” degan qo‘shig‘imizning klipiga 5 ming dollar, bungacha esa qo‘shiqni sotib olishga ham pul sarflangan. Unga umumiy 7 ming dollar ketgan.
— Garderobingizdagi eng qimmat kiyim?
— Kiyim javonimdagi eng qimmat kiyim bu — Balmain brendiga oid pidjak. Uni 3900 dollarga olganman. Aslida so‘nggi 2-3 yil ichida qimmatbaho kiyimlar sotib olishni boshladim. Ungacha kiyimga ko‘p pul sarflamasdim. Yevropaga borganimda qimmatbaho brendlarga havasim kelib sotib oldim. Lekin qimmat kiyim olsangiz, uni juda ham avaylab kiyar ekansiz.
— To‘yda eng ko‘p qancha pul “qistirishgan”?
— Bitta tadbirda boshqa tildagi qo‘shiqni kuylaganimda 10 ming dollar qistirishgan. O‘shanda boshqa millat vakiliga qo‘shig‘im shu qadar manzur bo‘lganidan u xizmat haqimdan tashqari qo‘limga 10 ming dollar bergan. Lekin boshqa bir ozarbayjoncha qo‘shig‘im uchun undan ham ko‘proq pul olganman. Biz 15 kishi bo‘lib borganmiz. Hammamizga sovg‘a-salom, mehmondorchilik va “ikki millat o‘rtasidagi aloqalarni mustahkamlaganim uchun” juda katta pul berishgan.
— Eshitishimizcha, siz Hamdam Sobirovdan xafa ekansiz?
— Shu paytgacha ijodkorlar bilan oramizda hech qanday kelishmovchiliklar bo‘lmagan. “Mayli” qo‘shig‘imizni Hamdam Sobirov yozib bergan, u muxlislarga juda manzur bo‘lgan edi. Shuning uchun Hamdamga qo‘ng‘iroq qilib qo‘shiq so‘rasam “Hozir unaqa qo‘shiqlar yo‘q”, dedi. Lekin boshqa xonandalarga yozib beryapti. Shundan keyin bildimki, balki unga ko‘proq gonorar taklif qilish kerakmikan? U meni Instagram sahifasidan ham chiqarib yuboribdi, hozir men ham uni kuzatmayman. Bu gaplarni mavzu to‘g‘ri kelgani uchun gapirdim, u bilan hamkorlik qilgim keladi, chunki yaxshi ijodkor.
Izoh (0)