O‘zbekistonlik 100 nafar fuqaro Vengriyaga ishga yuboriladi

O‘zbekistonlik 100 nafar fuqaro Vengriyaga ishga yuborilishi kutilmoqda. Bu haqda “Dunyo” axborot agentligi xabar berdi. 

Unga ko‘ra, O‘zbekistonning diplomatik vakolatxonasi ko‘magida Vengriyaning Worknet Kft. kompaniyasi direktori David Penzesh va O‘zbekiston Bandlik va mehnat munosabatlari vazirligi huzuridagi Tashqi mehnat migratsiyasi masalalari agentligi boshlig‘i o‘rinbosari Hojiakbar Fayzullaxo‘jayev o‘rtasida videokonferensaloqa formatida muzokaralar tashkil etildi.

Onlayn muloqot chog‘ida O‘zbekistondan mehnat muhojirlarini Vengriyaga jalb qilish, Tashqi mehnat migratsiyasi masalalari agentligi va ushbu kompaniya o‘rtasida hamkorlik shartnomasini tuzish masalalari muhokama qilindi.

Muzokaralar davomida agentlikning chet tillarini tanlash, tayyorlash, o‘rgatish sohasidagi faoliyati, O‘zbekistondan bo‘lajak mehnat migrantlari uchun davlat tomonining kafolatlari va shartlari haqida batafsil maʼlumot berildi.

Vengriya tomoni O‘zbekiston Tashqi mehnat migratsiyasi masalalari agentligi bilan hamkorlik aloqalarini o‘rnatish va agentlik tomonidan yuborilgan mehnat migrantlarini Vengriyaga yollash va ishga joylashtirish sohasida shartnoma tuzishga tayyorligini bildirdi.

Uchrashuv natijasida O‘zbekiston Tashqi mehnat migratsiyasi masalalari agentligi va Worknet Kft. kompaniyasi o‘rtasida hamkorlik shartnomasini imzolash to‘g‘risida kelishuvga erishildi. David Penzesh, shuningdek, joriy aprel oyidan boshlab 100 nafar o‘zbekistonliklarni Vengriyadagi qurilish obyektlarida ish bilan taʼminlashga tayyorligini bildirdi.