Joriy yilning 21-mart kuni Jeyk Jillinhol va UFC sobiq chempioni Konor Makgregor ishtirokidagi “Yo‘l bo‘yidagi uy” filmi premyerasi bo‘lib o‘tdi. Ushbu film irlandiyalik sportchi uchun kinodagi debyut bo‘ldi.
Konor o‘zini kinoda sinab ko‘rgan yagona UFC jangchisi emas. Undan oldin ham bu amaliyotni ko‘pchilik sportchilar boshidan o‘tkazgan. Quyida Gollivud filmlarida ishtirok etgan UFC jangchilarini yodga olamiz.
Valentina Shevchenko Holli Berrining rejissyorlik debyutida rol o‘ynagan
UFC sobiq chempioni Shevchenkoning kinodagi ilk va hozircha yagona bo‘lib turgan ishtiroki 2020-yilda bo‘lgan. Valentina “Zarbalar” dramasida salbiy qahramon obrazini gavdalantirgan. Film farrosh bo‘lib ishlayotgan va MMA’ga qaytishga harakat qilayotgan sobiq UFC jangchisi haqida hikoya qiladi. Filmda bosh rolni ijro etgan Holli Berrining rejissyorlik debyuti bo‘lgan. Berri MMA’ning ashaddiy muxlisi va bir necha bor UFC janglarini tomosha qilish uchun borib turgan.
“Berrining rejasiga ko‘ra, barchasi hayotiy bo‘lishi kerak edi. U jang haqiqiy bo‘lishi kerakligini aytdi. Iloji boricha ishonchli ko‘rsatishga urinish kerak edi. Ba’zida u “Valentina, sen meni qattiroq urishing kerak”, derdi. Men esa bunday qilishga qo‘rqardim. Ammo Holli buni talab qilardi”, — syomka jarayonidan xotiralarini bo‘lishadi Valentina.
Netflix platformasi film huquqini 20 million dollarga sotib olgan. IMDb reytingida film 6,1 ball olgan.
Jorj Sen-Pyer “Qasoskorlar” filmida Kapitan Amerika bilan jang qilgan
Sen-Pyerning kinodagi debyuti 2009-yilda bo‘lgan. Sportchi “Hech qachon taslim bo‘lma” filmida o‘ynagan. Oradan 5 yil o‘tib, “Birinchi qasoskor 2” filmida Jorj Batrok rolini ijro etgan. Sen-Pyer ekranda ko‘p ko‘rinmasa-da, uning Kapitan Amerika bilan jangi tomoshabinlar yodida qolgan.
UFC’ning 3 karra chempioni 2021-yil “Lochin va Qishki askar” mini-serialida Batrok obraziga qaytgan. Bunga qadar esa Jorj mashhur “Kikbokschi” remeyki va Stiven Sigal ishtirokidagi “Salazarning o‘limi” filmlarida rol ijro etgan.
Frensis Ngannu “Forsaj”da rol ijro etgan
Og‘ir vazn toifasida sobiq UFC chempioni “Forsaj”ning 9-qismida epizodik rolda ishtirok etadi. Film jahon prokatida 720 million dollar daromad ko‘radi.
“Bu juda katta tajriba bo‘ldi. Bunga qadar kinoda rol o‘ynamaganman, shuning uchun mendan talab qilingan narsani chiqarib berishim qiyinroq kechgan.
Lekin ular sabr qilishdi. Kino — men uchun ulkan tajriba maydoni bo‘ldi”, — degan edi Ngannu.
Maykl Bisping Vin Dizel bilan bir filmda ishtirok etgan
O‘rta vazn toifasida sobiq UFC chempioni Bisping 2014-yilda kinoda debyut qilgan. “Plastik” nomli komediyada epizodik rol o‘ynagan. Oradan 3 yil o‘tib, “Uch iks: Dunyo hukmronligi” filmida Vin Dizel bilan birgalikda o‘ynagan. Maykl 2019-yilda “Uch tomonlama tahdid”, 2021-yilda esa “Hech qachon taslim bo‘lma” fimlarida rol ijro etgan.
2024-yilda Bisping ijrosidagi ikkita film dunyo yuzini ko‘radi, ulardan biri “Qizil Sonya” fentezi filmi. Maykl unda asosiy rollardan birini ijro etgan. Shuningdek, Bisping bo‘sh vaqtlarida UFC turnirlarida sharhlovchi va ekspert sifatida ishtirok etmoqda.
Rendi Kutyur “Chegarasizlar” filmida Stallone va Stethem bilan birga o‘ynagan
Bir necha karra UFC chempioni sportchilik faoliyati davomidayoq kinolarda rol ijro etishni boshlagan. Dastlab, Jet Li ishtirokidagi “Beshikdan to qabrgacha” filmida epizodik rol o‘ynagan, undan so‘ng “Yengib o‘tish” dramasida, “Katta Sten” komediyalarida ham katta-kichik rollarni o‘ynagan. 2008-yilda esa Kutyur “The Scorpion King: Books of souls” filmida salbiy qahramon obrazini gavdalantirgan. Sportchilik faoliyatini yakunlaganidan so‘ng kinoloyihalarda ishtirokini muntazam davom ettirdi.
“Chegarasizlar” filmidagi roli esa Kutyurga muvaffaqiyat olib keldi. Rendi shu vaqtga qadar 30 dan oshiq filmlarda rol o‘ynagan. 2023-yil esa u uchun omadli keldi: 3 ta film va bitta serialda rol ijro etdi.
Ronda Rouzi “Charli farishtalari” filmida o‘ynagan
UFC chempioni 2013-yilda promoushenda debyut qiladi va oradan bir yil o‘tib Silvestr Stallonening “Chegarasizlar 3” filmida o‘ynaydi. Keyinchalik “Forsaj 7” da ham Rouzi ko‘rinish beradi. 2019-yilda esa yangilangan “Charli farishtalari” filmida jang san’ati ustasi rolini o‘ynadi.
Ronda, shuningdek, “Anturaj”, “22 milya” filmlarida ham rol ijro etgan.
So‘nggi vaqtlarda Ronda kinolarda ko‘rinish bermayapti. U hozirda turmush o‘rtog‘i bilan birgalikda fermada yashamoqda. U hozir baxtliligini, hayvonlarni yaxshi ko‘rishini va Gollivudni sog‘inmayotganini bildirgan.
Izoh (0)