“Sevgi iztirobi”, “Qo‘rg‘on sirlari” va “Eshigimni qoq” kabi turk seriallari namoyishidan so‘ng ba’zi aktyor va aktrisalar ashaddiy kino va serial ixlosmandlarining nafrati va tazyiqiga uchragan. Seriallardagi qahramonni real hayotdagi insondan ajrata olmagan ba’zi tomoshabinlar aktyorlarni hatto sudga murojaat qilishiga majbur qilgan. Quyida rollari tufayli muxlislar nafratiga uchragan aktyor va aktrisalar voqealari bilan tanishamiz.
- Amir (“Sevgi iztirobi”) — Kaan Urganjio‘g‘lu
“Sevgi iztirobi” seralidagi Amir roli Kaan Urganjio‘g‘luga ham shon-shuhrat, ham tomoshabinlarning nafratini olib keldi. Nihon va Kamol juftligining sodiq muxlislari ularning birga bo‘la olmasligida aktyorni aybladi. Shu paytgacha dramatik sevgi hikoyasi haqidagi serialni tomosha qilgan har bir kishi aktyorning yangi rollariga ko‘nika olmaydi. Kaan kelishgan, mehribon va yoqimtoy yigitlarning rolini o‘ynasa ham, ular baribir Amirni ko‘rgandek bo‘lishadi.
- Pelin (“Qo‘rg‘on sirlari”) — Buche Buse Kahraman
Buche Buse Kahraman seriallarni sevuvchi tomoshabinlar tomonidan eng ko‘p tanqidlarga uchragan aktrisalardan biridir. “Qo‘rg‘on sirlari” namoyishi boshlangach, aktrisaning ijtimoiy tarmoqdagi sahifasiga yuzlab salbiy izohlar yog‘ila boshlagan. Hatto ba’zilar unga o‘lim tilagan. Aktrisa Pelin salbiy obrazini shunchalar yaxshi ijro etganki, tarmoqlarda negativ izohlar oqimi tugamagan va Buche Buse ba’zi foydalanuvchilarni sudga berishga va ijtimoiy sahifasini tartibga solishga majbur bo‘lgan. Serialning ikkinchi mavsumida Pelinning yana paydo bo‘lishi muxlislarni yanada xayron qoldirdi.
- Kazim (“Qo‘rg‘on sirlari”) — Diren Polatog‘ullari
“Qo‘rg‘on sirlari” dagi Seyran va Sunaning otasi rolini ijro etgan Diren ham auditoriyaning nafratiga duchor bo‘lgan. Serialda o‘lim yoqasiga kelganda tavba qilgan va yaxshi insonga aylangan Kazim obrazi hanuz muxlislar ongida eng salbiy xarakter sifatida qolib ketgan. Buning ustiga, aktyor boshqa ko‘plab loyihalarda ko‘proq salbiy qahramon rollarini o‘ynab kelgan.
- Jelal (“Ichkarida”) — Chetin Tekindor
Chetin Tekindor aktyorlik bilim va mahoratini turk yulduzlarining yosh avlodiga yetkazib berayotgan chinakam iste’dodli inson. “Ichkarida” serialini doimiy ravishda tomosha qilganlar Jelal ismli qahramonni qattiq qoralagani shubhasiz. Aktyor serialda unga yoqmagan va yo‘liga to‘sqinlik qilgan har qanday insonni o‘ldirishga tayyor bo‘lgan mafiya boshlig‘i obrazini gavdalantirgan.
- Balja (“Eshigimni qoq”) — Ilayda Chevik
“Eshigimni qoq” serialida aktrisa Ilayda Chevik ijro etgan salbiy qahramon loyihada qisqa vaqt ko‘rinish bergan bo‘lsa-da, tomoshabinlar nafratini qo‘zg‘ashga ulgurdi. Ijtimoiy tarmoqlarda aktrisaga turli bosimlar, haqoratlar, kinoni tark etishi lozimligi haqida izohlar kelishi bunga dalildir.
- Nevra (“Qo‘rg‘on sirlari”) — Betyul Aktel
Nevra rolini ijro etish, ehtimol, Betulning eng tavakkalona qarorlaridan biri edi, chunki aktrisa Buche Buse Kahraman singari auditoriya nafratiga uchrashini avvaldan bilgan. Axir serialda Ferit Korhanning sevgilisi rolini o‘ynash tomoshabinlar g‘azabiga duchor bo‘lish demakdir.
- Jengiz (“Mening onam”) — Berkay Atesh
“Mening onam” teleserialida bosh qahramonning o‘gay qizini tahqirlashini ko‘rish tomoshabinlarni chuqur qayg‘u va g‘azabga soldi, chunki aktyor Berkat Atesh salbiy obrazni professional va ishonarli tarzda ijro etgan. Serialning ilk qismlari chiqqandan keyin aktyorga nisbatan muntazam ravishda tahdidlar bo‘lgan.
Izoh (0)