Toshkent viloyatida faoliyati “qoniqarsiz” deb baholangan hokim va rahbarlar lavozimida qolmaydi, deb xabar bermoqda viloyat hokimligi axborot xizmati.
Unga ko‘ra, endilikda mahalliy ijro etuvchi hokimiyat organlari, korxona-tashkilot rahbarlari va ularning o‘rinbosarlari faoliyati samaradorligi yaʼni, KPIni baholash tizimi yanada takomillashtiriladi. Samaradorlik ko‘rsatkichlari prezident va Vazirlar Mahkamasi qarorlari, topshiriqlarida belgilangan ko‘rsatkichlardan past bo‘lmagan darajada choraklar kesimida belgilab boriladi.
Hokimlar, korxona-tashkilot rahbarlari hamda ularning o‘rinbosarlari samaradorlik ko‘rsatkichi 70 foizdan kam bo‘lganda – “qoniqarsiz”, 70 foizdan 85 foizgacha – “qoniqarli”, 85 foizdan 100 foizgacha – “yaxshi” hamda 100 foiz va undan yuqori bo‘lganda “aʼlo” deb baholanadi.
Shuningdek, yil yakuni bo‘yicha ish samaradorlik ko‘rsatkichlariga erishish natijalari “qoniqarsiz” deb baholangan rahbarlar va o‘rinbosarlariga nisbatan egallab turgan lavozimiga loyiqligi masalasi ko‘rib chiqiladi.
Izoh (0)